UHabhakuki 3

₂Simakade, ngizwile umbiko ngawe,

ngiyawesaba Simakade umsebenzi wakho;

uvuselele nakule minyaka,

wenze ukuba waziwe kule minyaka,

ukhumbule isihawu sakho nasolakeni.

₃UNkulunkulu uvela eThemani,

oNgcwele uphuma entabeni iPharanu.Sela

Inkazimulo yakhe isibekela amazulu,

udumo lwakhe lugcwele umhlaba.

₄Ukukhanya kwakhe kufana nelanga liphuma,

imisebe ivela esandleni sakhe,

kulapho amandla akhe efihlwe khona.

₅Phambi kwakhe kuhamba ubhubhane,

kulandele isifo ezinyaweni zakhe.

₆Uyama, azamazamise umhlaba;

uyabuka, athuthumelise izizwe;

izintaba zakudala ziyabhidlizwa,

namagquma asemandulo ayakhothama,

yizindlela zakhe zaphakade.

₇Ngibona amathende aseKhushani ekhungethwe wusizi,

amakhethini akwaMidiyani ayathuthumela.

₈Simakade, ngabe ubuyithukuthelele yini imifula na?

Ngabe ulaka lwakho belumelene yini nemifula

noma intukuthelo yakho nolwandle,

ukuba ugibele amahhashi akho,

nezinqola zakho zokunqoba, na?

₉Umnsalo wakho usulungile,

uvele obala,

ubize imicibisholo emgodleni,

wadabula umhlaba ngemifula. Sela

₁₀Izintaba zikubona qede ziyobayobe;

isikhukhula siyadlula;

izinzulu zizwakalise ukuhlokoma kwazo,

ziphakamisele phezulu izandla zazo.

₁₁Ilanga nenyanga kwama nse endaweni yakho

ngokubenyezela kwemicibisholo yakho eshwezayo

nangokunyazima komkhonto wakho okhanyayo.

₁₂Udabula umhlaba ngentukuthelo,

ugxobagxobe izizwe ngolaka.

₁₃Uphumele ukusindiswa kwabantu bakho,

ukusindiswa kogcotshiweyo wakho;

uphohloza umholi endlini yababi,

umhlubule kusukela phansi

kuze kube sentanyeni. Sela

₁₄Ugwaza ikhanda lomholi wabo

ngeyakhe imikhonto,

lapho amabutho akhe engithelekela

ukuba angihlakaze,

ejabula njengazoshwabadela ompofu esithe.

₁₅Unyathela ulwandle ngamahhashi akho,

amanzi amaningi agubhayo.

₁₆Ngezwa, qede kwathuthumela izibilini zami,

izindebe zomlomo wami

zaqhaqhazela ngomsindo;

ukuvendlezela kwangena emathanjeni ami,

ngathuthumela lapho ngimi khona,

ngizothula ngilinde kuze kufike

usuku lwenhlupheko kubantu abasihlaselayo.

₁₇Noma umkhiwane ungeqhakaze,

nemivini ingabi nazithelo,

nomsebenzi womnqumo ungaphumeleli,

amasimi angabi nasivuno,

kungabi bikho mhlambi wezimvu

nezimbuzi esibayeni nazinkomo esibayeni,

₁₈nokho mina ngiyakujabula ngoSimakade,

ngithokoze ngoNkulunkulu wensindiso yami.

₁₉USimakade iNkosi, ungamandla ami,

wenza izinyawo zami zibe njengezendluzela,

enze ngihambe ezindaweni zami eziphakemeyo.

Kumholi wokuhlabelelisa ngohabhu lwami.