KwabaseGalathiya 5

₁UKhristu wasikhulula ukuze sibe ngabakhululekileyo. Ngakho-ke yimani niqine, ningabe nisaboshelwa ejokeni lobugqila. ₂Mina Pawula ngithi kini: uma nisoka, uKhristu akanalusizo lwalutho kini. ₃Ngiyaphinda ngiyafakaza kubantu bonke ukuthi osokayo uphoqelekile ukuba awufeze wonke umthetho. ₄Nahlukene noKhristu nina nonke enifuna ukulungisiswa ngomthetho; niwile emseni. ₅Ngokuba thina, ngaye uMoya, silindele ithemba lokulungisiswa ngokukholwa. ₆KuKhristu ukusoka nokungasoki akusho lutho, kodwa ukukholwa okuvezwa wuthando.

₇Benigijima kahle, pho ngubani onithiyile ukuba ningalilandeni iqiniso na? ₈Lokhu kuhehwa akuveli kulowo owanibizayo. ₉Imvubelo encane iyikhukhumalisa yonke inhlama. ₁₀Nginethemba ngani eNkosini ukuthi aniyukucabanga ngenye indlela. Kepha noma ngabe ngubani lowo onikhathazayo, uyakuthwala ukwehlulelwa. ₁₁Kepha mina, bazalwane, uma ngisashumayela ukusoka, pho ngizingelelwani na? Ukuba bekunjalo ngabe sisusiwe isikhubekiso sesiphambano. ₁₂Sengathi bangazithena bona labo abanihluphayo.

₁₃Ngokuba nina bazalwane nabizelwa enkululekweni, ningayisebenzisi-ke inkululeko njengezaba zokwenza imisebenzi yenyama, kodwa khonzanani ngothando. ₁₄Ngokuba umthetho wonke uqoqwe ezwini linye lokuthi: “Wothanda umakhelwane wakho njengalokhu uzithanda wena.”

₁₅Kepha uma nilumana, ninephulana nodwa, qaphelani, funa niqedane.

₁₆Kepha ngithi: hambani ngoMoya, khona aniyukuzifeza izinkanuko zemvelo yenu eyonakeleyo. ₁₇Ngokuba imvelo eyonakeleyo ikhanuka okuphambene noMoya, noMoya okuphambene nemvelo eyonakeleyo. Lezi zinto ziyamelana, ukuze ningakwenzi lokho enikufisayo. ₁₈Kepha uma niholwa nguMoya, anikho neze phansi komthetho.

₁₉Imisebenzi yemvelo eyonakeleyo isobala, yilena: ubufebe, ukungcola, amanyala, ₂₀ukukhonza izithombe, ukuthakatha, ubutha, ukulwa, umona, ulaka, ubugovu, ukwehlukana, ukuba maqembuqembu, ₂₁umhawu, ukudakwa nokuxokozela, izinto ezifana nalezi engiqeda ukunitshela ngazo, njengokuba ngasho, abenza lezi zinto abanakulidla ifa loMbuso kaNkulunkulu.

₂₂Kepha izithelo zikaMoya ziluthando, ukujabula, ukuthula, ukubekezela, ububele, ukulunga, ukukholwa, ₂₃ubumnene, nokuzithiba. Akukho mthetho ongamelana nalezi zinto. ₂₄Kepha abakaKhristu bayibethele imvelo eyonakeleyo nokuhuheka nezinkanuko zayo. ₂₅Uma siphila ngoMoya, masenze futhi okuhambisana noMoya. ₂₆Masingaziqhenyi, siqalane, noma sibe nomhawu omunye ngomunye.