UHezekeli 37

₁Isandla sikaSimakade sasiphezu kwami, sangikhipha ngoMoya kaSimakade, sangibeka phakathi esigodini esasigcwele amathambo. ₂Wangidlulisa kuwo, ngawazungeza; bheka, impela ayemaningi ngokwedlulele kuso isigodi, futhi ayome kakhulu. ₃Wayesethi kimi: “Ndodana yomuntu, lawa mathambo angaphila na?”

Ngathi: “Nkosi Simakade, nguWena owaziyo.”

₄Wayesethi kimi: “Phrofetha phezu kwalawa mathambo, uthi kuwo: ‘Nina mathambo omileyo, yizwani izwi likaSimakade. ₅Isho kanje iNkosi uSimakade kulawa mathambo, ithi: Bhekani, ngiyakufaka umoya kini, niphile. ₆Ngiyakubeka imisipha phezu kwenu, ngihlumise inyama phezu kwenu, nginimboze ngesikhumba, ngifake umoya kini, niphile, niyakukwazi ukuthi nginguSimakade.’ ”

₇Ngase ngiphrofetha njengoba ngangiyaliwe. Kwathi lapho ngisaphrofetha kwaba khona umsindo nobukhehlekhehle; amathambo asondelana, kwayilelo thambo lisondela kwelinye. ₈Ngase ngibona kuvela imisipha phezu kwawo, kwahluma inyama, isikhumba sawamboza ngaphezulu, kodwa umoya wawungekho kuwo.

₉Wayesethi kimi: “Ndodana yomuntu, phrofetha kuwo umoya, phrofetha uthi kuwo: ‘Isho kanje iNkosi uSimakade, ithi: “Woza, moya uvele emimoyeni yomine, uphefumulele laba ababuleweyo, ukuze baphile.” ’ ”

₁₀Ngase ngiphrofetha njengoba ngiyaliwe; umoya wangena kuwo, aphila, ema ngezinyawo zawo, aba yimpi enkulu kakhulu impela.

₁₁Wayesethi kimi: “Ndodana yomuntu, lawa mathambo ayindlu yonke yakwa-Israyeli, bathi: ‘Bheka, amathambo ethu omile, siphelelwe yithemba, sibhujisiwe.’

₁₂“Ngakho-ke phrofetha, uthi kubo: ‘Isho kanje iNkosi uSimakade, ithi: “Ngiyakuvula amathuna enu, nginikhuphule emathuneni enu, nina bantu bami, nginiyise kwa-Israyeli. ₁₃Niyakukwazi ukuthi nginguSimakade lapho sengiwavulile amathuna enu, nganikhuphula kuwo, nina bantu bami. ₁₄Ngiyakuwufaka uMoya wami kini, bese niphila, nginibeke ezweni lakini; niyakukwazi ukuthi Mina Simakade ngikhulumile, futhi ngiyakukwenza lokho,” ’ ” kusho uSimakade.

₁₅Izwi likaSimakade lafika kimi, lathi: ₁₆“Wena ndodana yomuntu, zithathele induku, ulobe kuyo, uthi: ‘EkaJuda nabakwa-Israyeli abangabangani bakhe.’

“Thatha enye induku futhi, ulobe kuyo, uthi: ‘EkaJosefa, induku ka-Efrayimi nendlu yonke yakwa-Israyeli, abangabangani bakhe.’ ₁₇Zihlanganise ndawonye, zibe yinduku eyodwa, induku eyodwa esandleni sakho.

₁₈“Kuyothi lapho abantu bakini bekubuza, bethi: ‘Ungesitshele yini ukuthi lezi zinduku zichazani kuwe na?’

₁₉“Ubobatshela uthi: ‘Isho kanje iNkosi uSimakade, ithi: “Induku kaJosefa esesandleni sika-Efrayimi nezizwe zakwa-Israyeli ezingabangani bakhe, ngiyakukuthatha ngikubeke endukwini kaJuda, ngikwenze kube yinduku eyodwa, babe munye esandleni sami.” ’

₂₀“Izinduku olobe kuzo ziyakuba sesandleni sakho bazibonele ngawabo amehlo. ₂₁Khuluma kubo, uthi: ‘Isho kanje iNkosi uSimakade, ithi: “Ngiyakubathatha abakwa-Israyeli ezizweni lapho baya khona, ngibaqoqe nxazonke, ngibayise ezweni lakubo. ₂₂Ngiyakubenza babe yisizwe esisodwa ezweni, ezintabeni zakwa-Israyeli, kube nenkosi eyodwa eyakubabusa bonke, bangabe besaba yizizwe ezimbili, futhi bangabe besahlukaniswa babe yimibuso emibili. ₂₃Abasayukuzingcolisa ngezithombe zabo, ngokunengekayo kwabo, nangesisodwa seziphambeko zabo, kepha ngiyakubasindisa kukho konke ukuhlubuka kwabo abone ngakho, ngibahlambulule babe ngabantu bami, Mina ngibe nguNkulunkulu wabo.

₂₄“ ‘ “Inceku yami, uDavide, iyakuba yinkosi, ibabuse, bonke babe nomelusi oyedwa, bayakuhamba ezehlulelweni zami, bazigcine izimiso zami, futhi bazenze. ₂₅Bayakuhlala ezweni engilinike inceku yami, uJakobe, ababehlala kulo okhokho bakho; bayakuhlala kulo, bona nabantwana babo, nezizukulwane zabo kuze kube phakade. UDavide inceku yami uyakuba yinkosi yabo kuze kube phakade. ₂₆Ngiyakukwenza isivumelwano sokuthula nabo, sibe yisivumelwano saphakade; ngiyakubahlalisa bazinze, ngibandise, ngibeke indlu yami engcwele phakathi kwabo kuze kube phakade. ₂₇Indawo yami yokuhlala iyakuba kubo, Mina ngiyakuba nguNkulunkulu wabo, bona babengabantu bami. ₂₈Izizwe ziyakukwazi ukuthi Mina Simakade ngingcwelisa u-Israyeli, lapho indlu yami engcwele isiphakathi kwabo, kuze kube phakade.” ’ ”