UHezekeli 16

₁Izwi likaSimakade lafika kimi, lathi: ₂“Ndodana yomuntu, lazise iJerusalema ngezinengiso zalo, ₃uthi: ‘Isho kanje iNkosi uSimakade kulo iJerusalema, ithi: “Indabuko yakho nokuzalwa kwakho kuseKhanani. Uyihlo wayengumAmoni, unyoko engumHithi. ₄Ekuzalweni kwakho, ngosuku owazalwa ngalo, inkaba yakho ayinqunywanga, awugezwanga ngamanzi ukuba uhlambuluke, awuhlikihlwanga ngosawoti, awusongwanga nakusongwa. ₅Akukho liso elakubheka lakuhawukela ukuba wenzelwe okukodwa kwalokho, ukhonjiswe ububele, kodwa walahlwa endle, ngokuba wanengeka ngosuku owazalwa ngalo.

₆“ ‘ “Ngesikhathi ngidlula ngakuwe, ngakubona ungqashangqasha egazini lakho, ngathi kuwe: wena osegazini lakho: Phila! Yebo, ngasho kanjalo usegazini lakho, ngathi kuwe: Phila! ₇Wande njengehlumela lasendle. Ngakwenza wakhula, waba muhle kakhulu; wahlosa amabele, wamila izinwele, kodwa wawunqunu, uhamba ze.

₈“ ‘ “Ngesikhathi ngiphinda ngidlula ngakuwe, ngakubuka; ngabona ukuthi usukhulile, usungathanda. Ngase ngendlala isembatho sami phezu kwakho, ngafihla ubunqunu bakho, yebo, ngafunga kuwe, ngenza nawe isivumelwano,” ’ ” kusho iNkosi uSimakade, waba ngowami.

₉“ ‘ “Ngakugeza emanzini, ngasusa igazi elalikuwe, ngakugcoba ngamafutha. ₁₀Ngakwembesa ngengubo efekethisiweyo, ngakufaka izicathulo zesikhumba, ngakwethwesa ilineni elicolekileyo ekhanda, ngase ngikwemboza ngosilika. ₁₁Ngakuvunulisa ngemvunulo kanokusho, ngakufaka amasongo ezandleni zakho nomgexo entanyeni. ₁₂Ngakufaka indandatho ekhaleni, amacici ezindlebeni zakho, nomqhele omuhle ekhanda lakho. ₁₃Wahlotshiswa ngegolide nangesiliva, isembatho sakho sasiyilineni elicolekileyo, usilika, nengubo efekethisiweyo. Wadla impuphu ecolisekileyo, uju, namafutha. Impela wawumuhle kakhulu, waphumelela, waze waba yindlovukazi. ₁₄Igama lakho laduma ezizweni ngenxa yobuhle bakho, ngokuba laliphelele ngenxa yemihlobiso engangikuvunulise ngayo,” ’ ” kusho iNkosi uSimakade.

₁₅“ ‘ “Kepha wethembela ebuhleni bakho, waba yisifebe ngenxa yodumo lwakho, wabuthululela bonke ubufebe bakho kwabadlulayo, baba ngobabo. ₁₆Wathatha ezinye zezingubo zakho, wazenzela izindawo eziphakemeyo ezikhangayo, wafebela kuzo, okungakaze kwenzeke futhi okungasoze kwenzeka nanini. ₁₇Wathatha imvunulo yobuhle bakho, egolideni lami nasesiliveni lami engangikuphe khona, wazenzela izithombe zabesilisa, wafeba nazo. ₁₈Wathatha izingubo zakho ezifekethisiweyo, wasibekela ngazo izithombe, wabeka amafutha ami nempepho yami phambi kwazo. ₁₉Wathatha nesinkwa sami engangikunike sona, impuphu ecolisekileyo, amafutha, noju engangikunike khona ukuba ukudle, wakubeka phambi kwazo, kwaba yiphunga elimnandi; kwaba kanjalo-ke,” ’ ” kusho iNkosi uSimakade.

₂₀“ ‘ “Wathatha amadodana namadodakazi akho owawungizalele wona, wawahlabela zona ukuba azidle. Babubuncane yini ubufebe bakho na? ₂₁Wabulala abantwana bami, wanikela ngabo kuzo, wabadabulisa emlilweni. ₂₂Kuzo zonke izinengiso owazenza, nobufebe bakho, awuzikhumbulanga izinsuku zobusha bakho, ngesikhathi wawunqunu, uhamba ze, ungqashangqasha egazini lakho.

₂₃“ ‘ “Maye! Maye,” ’ ” kusho iNkosi uSimakade.

“ ‘ “Ngokuba kwathi emveni kwakho konke lokho kona kwakho, ₂₄wazakhela iqhugwane, wazenzela indawo ephakemeyo ezigcawini zonke. ₂₅Ekuqaleni kwayo yonke imigwaqo, wakha izindawo zakho eziphakemeyo, wenza ubuhle bakho baba yisinengiso, imilenze yakho wayenekela bonke abedlulayo, wandisa ubufebe bakho. ₂₆Wafeba nabaseGibhithe, omakhelwane bakho, abagcwele inkanuko enkulu, wandisa ubufebe bakho ukuba ungichukuluze, ukuze ngithukuthele. ₂₇Ngelulela isandla sami kuwe, ngamelana nawe, ngasinciphisa isabelo sakho sokudla, ngakunikela entandweni yabakuzondayo. Amadodakazi amaFilisti ayenamahloni ngendlela owawulihathanga ngayo. ₂₈Wafeba nabantu base-Asiriya, ngokuba wawungeneliswa; yebo, wafeba nabo, kodwa kuze kube manje awukadeli. ₂₉Wandisa ubufebe bakho baze bafinyelela nasezweni labahwebi, iKhalideya, kepha nalokho akukwenelisanga.

₃₀“ ‘ “Maye, ubuthakathaka benhliziyo yakho, ngokuba wenza konke lokhu okwenziwe yisifebe esingakwazi ukuzithiba!” kusho iNkosi uSimakade.

₃₁“ ‘ “Lapho wakha iqhugwane lakho ekuqaleni kwemigwaqo, wenza indawo yakho ephakemeyo kuzo zonke izigcawu, wawungafani nesifebe esikhokhelwayo, ₃₂wena mfazi ophingayo, othatha abafokazi esikhundleni sendoda yakhe. ₃₃Zonke izifebe ziyakhokhelwa, kodwa wena nguwe okhokhela zonke izithandwa zakho, uzifumbathisile ukuba zize kuwe, zivela ezindaweni zonke, ngobufebe bakho. ₃₄Wehlukile kwabanye besifazane ngokufeba kwakho, akekho okulandelayo ukuze afebe nawe, ngokuba nguwe okhokhayo; wena awukhokhelwa lutho, ngalokho-ke wena wehlukile kwezinye izifebe.

₃₅“ ‘ “Ngakho-ke sifebe ndini, yizwa izwi likaSimakade. ₃₆Isho kanje iNkosi uSimakade, ithi: Ngenxa yokuthi inkanuko yakho ithululiwe, nobunqunu bakho bembuliwe ngobufebe bakho nezithandwa zakho, nangenxa yazo zonke izithombe zakho eziyizinengiso, nangegazi labantwana bakho owanikela ngalo; ₃₇ngakho-ke bheka, ngiyakuziqoqa zonke izithandwa zakho ozithokozise ngazo, zonke ozithandileyo, nazo zonke ozizondileyo; ngiyakuziqoqela kuwe zivela kuzo zonke izindawo, ngizembulele ubunqunu bakho ukuba zibubone bonke. ₃₈Ngiyakukwehlulela ngesehlulelo seziphingikazi nesabachithi begazi, ngehlisele phezu kwakho igazi lolaka nomhawu. ₃₉Ngiyakukunikela ezandleni zazo, zilibhidlize iqhugwane lakho, zizidilize izindawo zakho eziphakemeyo, zikuhlubule izingubo zakho, zithathe izinto zakho ezinhle, zikushiye unqunu, uhamba ze. ₄₀Ziyakuza kuwe nesixuku, zikukhande ngamatshe, zikuhlahlele ngezinkemba zazo. ₄₁Ziyakushisa izindlu zakho ngomlilo, zikwehlulele phambi kwabesifazane abaningi. Ngiyakukwenza ukuba uyeke ukufeba, ungabe usakhokhela muntu. ₄₂Ngiyakulubohlisa ulaka lwami kuwe, ngisuse umona wami kuwe, ngibe nokuthula, ngingabe ngisakuthukuthelela futhi.

₄₃“ ‘ “Ngenxa yokuthi awuzikhumbulanga izinsuku zobusha bakho, kodwa ungithukuthelisile ngakho konke lokhu, nami-ke ngizokwehlisela phezu kwekhanda lakho konke okwenzileyo, ukuze ungabe usazikhanukela zonke ezinye izinengiso zakho,” ’ ” kusho iNkosi uSimakade.

₄₄“ ‘ “Bonke abacaphuna izaga, bayakucaphuna lesi mayelana nawe, bathi: Ukhamba lufuze imbiza.

₄₅“ ‘ “Wena ufuze unyoko, owayenengwa yindoda yakhe, nayizingane zakhe. Ungudade owayenodadewabo, ababenengwa ngamadoda abo nabantwana babo. Unyoko wayengumHithi, uyihlo engumAmori. ₄₆Udadewenu omdala kwakuyiSamariya, amadodakazi akhe, akhe ngasenyakatho yakho. Udadewenu omncane kunawe, wayehlala ngaseningizimu kwakho, uyiSodoma namadodakazi alo. ₄₇Awuhambanga njengezindlela zabo, awenzanga njengezinengiso zabo, kodwa ngesikhashana nje esincane, wena wonakala ukwedlula bona, ezindleleni zakho zonke. ₄₈Ngifunga ngiyagomela,” ’ ” kusho iNkosi uSimakade, “ ‘ “udadewenu uSodoma namadodakazi akhe, akenzanga njengoba kwenze wena namadodakazi akho.

₄₉“ ‘ “Nakhu okwakungukona kukadadewenu uSodoma: ukuzikhukhumeza, ukuba yisiminzi, nokunethezeka namadodakazi akhe; kodwa ababasizanga abampofu nabantulayo. ₅₀Babeziphakamisa, benza izinengiso phambi kwami, ngase ngibasusa njengokubona kwami. ₅₁ISamariya, izono elizenzileyo azisiyo ngisho ingxenye yezono zakho; wena wandise kakhulu izinengiso zakho kunabo, odadewenu ubenze babukeka belungile kunawe ngenxa yalezi zinengiso ozenzileyo. ₅₂Zithwalele ihlazo lakho, ngokuba ubavunile odadewenu ngezono zakho ozenzileyo ezinengekayo; bona sebelungile kunawe. Yebo, mawujabhe, ulithwale ihlazo lakho lokubavuna odadewenu.

₅₃“ ‘ “Ngiyakukuguqula ukuthunjwa kwabo, ukuthunjwa kweSodoma namadodakazi alo, nokuthunjwa kweSamariya namadodakazi alo, nokuthunjwa kwabo bonke abathunjiweyo abaphakathi kwabo, ₅₄ukuze ulithwale ihlazo lakho, uthunazeke ngenxa yakho konke okwenzileyo, lapho ubaduduza. ₅₅Odadewenu, iSodoma namadodakazi alo, bayakubuyela esimweni sabo sokuqala, neSamariya namadodakazi alo, bayakubuyela esimweni sabo sokuqala, wena namadodakazi akho niyakubuyela esimweni senu sokuqala. ₅₆Udadewenu uSodoma awukhulumanga kahle ngaye ngesikhathi usazikhukhumeza, ₅₇lapho bungakambulwa ububi bakho, njengasesikhathini sehlazo lamadodakazi ase-Aramu, nawo wonke amadodakazi amaFilisti alizungezileyo, akudumaza nhlangothi zonke. ₅₈Uyakulithwala icala lokukhanuka kwakho nezinengiso zakho,” ’ ” kusho uSimakade.

₅₉“ ‘Ngokuba isho kanje iNkosi uSimakade, ithi: “Ngizokwenza uvune okutshalileyo, udelele isifungo ngokwephula isivumelwano. ₆₀Kepha Mina ngiyakusikhumbula isivumelwano sami nawe, sasemihleni yobusha bakho, bese ngikumisela isivumelwano saphakade. ₆₁Uyakuzikhumbula izindlela zakho, ube namahloni, lapho wemukela odadewenu, omdala kunawe nomncane kunawe, ngikunike bona babe njengamadodakazi, kodwa hhayi ngenxa yesivumelwano sami nawe. ₆₂Ngiyakumisa isivumelwano sami nawe, wazi ukuthi nginguSimakade, ₆₃ukuba ukhumbule, ube namahloni, ungabe usawuvula umlomo wakho futhi, ngenxa yehlazo lakho, lapho sengikuthethelele konke okwenzileyo,” ’ ” kusho iNkosi uSimakade.