I-Eksodusi 40

₁USimakade wakhuluma kuMose, wathi:

₂“Ngosuku lokuqala lwenyanga yokuqala uyakulimisa ithabanakeli lethende lokuhlangana. ₃Uyakufaka kulo umphongolo wesivumelwano, bese uwuhenqela umphongolo ngesihenqo. ₄Uyakungenisa itafula, uhlele izinto eziphezu kwalo, uyakufaka uthi lwesibani bese ubeka izibani zalo. ₅Uyakubeka i-althare legolide lokushisela impepho phambi komphongolo wesivumelwano, bese ufaka isihenqo somnyango wethabanakeli. ₆Uyakubeka i-althare lomnikelo wokushiswa phambi komnyango wethabanakeli lethende lokuhlangana. ₇Ubeke umcengezi phakathi kwethende lokuhlangana ne-althare, uthele amanzi kuwo. ₈Uyakulungisa igceke nxazonke, bese ulengisa isihenqo sesango legceke.

₉“Uyakuthatha amafutha okugcoba, ugcobe ithabanakeli nakho konke okukulo, ulingcwelise nayo yonke impahla yalo, ukuze libe ngcwele. ₁₀Uyakugcoba ne-althare lomnikelo wokushiswa nayo yonke impahla yalo, ulingcwelise i-althare, ukuze i-althare libe ngcwelengcwele. ₁₁Uyakugcoba umcengezi nesinqe sawo, uwungcwelise.

₁₂“Emveni kwalokho uyakuletha u-Aroni namadodana akhe ekungeneni kwethende lokuhlangana, bese ubageza ngamanzi. ₁₃Uyakugqokisa u-Aroni izingubo ezingcwele, bese umgcoba, umngcwelise, ukuze angikhonze engumphristi. ₁₄Uyakuletha futhi namadodana akhe, uwembathise amabhantshi enkonzo. ₁₅Uwagcobe njengalokhu wenzile kuyise, ukuze angikhonze engabaphristi. Ukugcotshwa kwabo kuyobangenisa ebuphristini baphakade izizukulwane ngezizukulwane.”

₁₆UMose wenza konke njengalokhu uSimakade ayemyalile.

₁₇Ngenyanga yokuqala ngonyaka wesibili, ngosuku lokuqala lwenyanga, ithabanakeli lamiswa. ₁₈UMose walimisa ithabanakeli, wabeka izisekelo zalo, wamisa amapulangwe, wafaka imishayo, wamisa izinsika zalo. ₁₉Walendlala ithende phezu kwethabanakeli, weleka ngokokulimboza phezu kwalo, njengalokhu uSimakade ayemyalile uMose. ₂₀Wathatha izibhebhe ezimbili zamatshe wazifaka emphongolweni. Wafaka izingongolo emphongolweni, wabeka isihlalo somusa phezu komphongolo. ₂₁Wawungenisa umphongolo ethabanakelini, wamisa isihenqo sokuhenqela umphongolo wesivumelwano, njengalokhu uSimakade ayemyalile uMose. ₂₂Wafaka itafula ethendeni lokuhlangana, walibeka ohlangothini olungasenyakatho lwethabanakeli ngaphandle kwesihenqo, ₂₃wahlela kahle isinkwa phezu kwalo phambi kukaSimakade, njengalokhu uSimakade ayemyalile uMose. ₂₄Wabeka uthi lwezibani ethendeni lokuhlangana, maqondana netafula elisohlangothini olungaseningizimu yethabanakeli. ₂₅Wayesebeka izibani phambi kukaSimakade, njengalokhu uSimakade ayemyalile uMose. ₂₆Wabeka i-althare legolide ethendeni lokuhlangana phambi kwesihenqo, ₂₇wayeseshisa kulo impepho enuka kamnandi, njengalokhu uSimakade ayemyalile uMose. ₂₈Walengisa isihenqo somnyango wethende. ₂₉Wabeka i-althare lomnikelo wokushiswa ngasemnyango wethabanakeli lethende lokuhlangana, wayesenikela phezu kwalo umnikelo wokushiswa, nowokusanhlamvu, njengalokhu uSimakade ayemyalile uMose. ₃₀Wabeka umcengezi phakathi kwethende lokuhlangana ne-althare, wathela kuwo amanzi okugeza, ₃₁ababezogeza ngawo izandla nezinyawo oMose no-Aroni namadodana akhe. ₃₂Lapho bengena ethendeni lokuhlangana nalapho besondela e-althare, babegeza, njengalokhu uSimakade ayemyalile uMose. ₃₃Walungisa igceke nxazonke zethabanakeli ne-althare, walengisa isihenqo sesango lalo. Wawuphothula kanjalo-ke uMose umsebenzi.

₃₄Ifu lalisibekela ithende lokuhlangana, inkazimulo kaSimakade yagcwalisa ithabanakeli. ₃₅UMose akakwazanga ukungena ethendeni lokuhlangana, ngokuba ifu lahlala phezu kwalo, nenkazimulo kaSimakade yagcwalisa ithabanakeli. ₃₆Kwakuthi lapho ifu liphakanyiswa phezu kwethabanakeli, abantu bakwa-Israyeli baqhubeke nohambo lwabo. ₃₇Kepha uma ifu lingaphakanyiswanga babengaqhubeki nohambo kuze kube lusuku eliphakanyiswa ngalo. ₃₈Ngokuba ifu likaSimakade laliba phezu kwethabanakeli emini, kuthi ebusuku kube khona umlilo efini. Bonke abakwa-Israyeli babekubona lokhu kuleyo naleyo ngxenye yohambo lwabo.