I-Eksodusi 29

₁“Yilokhu oyokwenza lapho usubehlukanisa ukuze bangikhonze bengabaphristi. Thatha iduna lenkomo, izinqama ezimbili okungenasici, ₂isinkwa esingenamvubelo, namaqebelengwane angenamvubelo agcotshwe ngamafutha, ukwenze ngempuphu kakolo ecolisekileyo. ₃Uyokufaka eqomeni elilodwa ukulethe ngalo, ulethe neduna, nezinqama ezimbili. ₄Uyoletha u-Aroni namadodana akhe ngasemnyango wethende lokuhlangana, ubageze ngamanzi. ₅Bese uthatha izingubo zobuphristi umgqokise u-Aroni ingubo, ibhantshi, ingubo yamahlombe, nesivikelo sesifuba, umbophe ngebhande lengubo yamahlombe elifekethisiweyo. ₆Uyakumethwesa umshuqulu ekhanda, bese ubophela umqhele ongcwele emshuqulweni. ₇Uyothatha amafutha okugcoba uwathele ekhanda lakhe, umgcobe. ₈Uyosondeza namadodana akhe, uwagqokise amabhantshi. ₉Uyobopha u-Aroni namadodana akhe ngemibhunkulo okhalo lwabo, ubathwese nezigqoko, ubuphristi buyakuba ngobabo ngokwesimiso saphakade. Uyakumbeka kanjalo u-Aroni namadodana akhe.

₁₀“Uyoletha inkunzi phambi kwethende lokuhlangana. U-Aroni namadodana akhe bayokubeka izandla zabo ekhanda layo. ₁₁Uyoyihlaba inkunzi phambi kukaSimakade ngasemnyango wethende lokuhlangana. ₁₂Uyothatha ingxenye yegazi layo ulininde ngomunwe wakho ezimpondweni ze-althare, bese kuthi yonke ingxenye yegazi eliseleyo ulithululele phansi esisekelweni se-althare. ₁₃Uyowathatha wonke amafutha emboze okwangaphakathi, namanoni asesibindini, nezinso zombili namanoni akuzo, ukushise e-althare. ₁₄Kodwa inyama yenkunzi, nesikhumba sayo, nomswani wayo, uyokushisela ngaphandle kwenkambu; kungumnikelo wesono.

₁₅“Uyothatha futhi enye yezinqama, bese u-Aroni namadodana akhe bebeka izandla zabo ekhanda layo. ₁₆Uyoyihlaba inqama bese uthatha igazi layo ulifafaze nxazonke ze-althare. ₁₇Uyoyihlahla inqama, ugeze ezangaphakathi nemilenze yayo, ukubeke ndawonye nezitho nenhloko yayo. ₁₈Uyoyishisa yonke inqama e-althare ngoba ingumnikelo wokushiswa kuSimakade; iyiphunga elimnandi; ingumnikelo womlilo kuSimakade.

₁₉“Uyothatha inqama yesibili bese u-Aroni namadodana akhe bebeka izandla zabo ekhanda layo. ₂₀Uyoyihlaba inqama, bese uthatha ingxenye yegazi layo uninde indlebe ka-Aroni yakwesokunene, izindlebe zakwesokunene zamadodana akhe, izithupha zakwesokunene zezandla zabo, noqukula babo bezinyawo zakwesokunene, bese igazi ulifafaza nxazonke ze-althare. ₂₁Uyothatha ingxenye yegazi elise-althare namafutha okugcoba ufafaze ngakho u-Aroni nezingubo zakhe, namadodana akhe nezingubo zawo, ngakho-ke yena nezingubo zakhe uyokuba ngcwele, kanjalo namadodana akhe nezingubo zawo.

₂₂“Uyothatha amanoni enqama, amanoni omsila, umhlwehlwe, amanoni asesibindini, izinso zombili namanoni azo, nomlenze wangakwesokudla, ngokuba yinqama yokubekwa kwabo. ₂₃Uyothatha eqomeni elethulwe phambi kukaSimakade, isinkwa, neqebelengwane lesinkwa esinamafutha, nekhekheba, ₂₄ukubeke konke lokhu ezandleni zika-Aroni nasezandleni zamadodana akhe, ukuzungezise kube ngumnikelo wokuzungeziswa phambi kukaSimakade. ₂₅Uyobuye ukuthathe ezandleni zabo ukushise e-althare phezu komnikelo wokushiswa kube yiphunga elimnandi phambi kukaSimakade; kungumnikelo womlilo kuSimakade.

₂₆“Uyothatha isifuba senqama yokugcotshwa kuka-Aroni, usizungezise, sibe ngumnikelo wokuzungeziswa phambi kukaSimakade; sibe yisabelo sakho. ₂₇Uyobusisa isifuba esizungezisiwe njengomnikelo wokuzungeziswa nomlenze ozungezisiwe njengomnikelo wokuzungeziswa enqameni yokugcotshwa kuka-Aroni, ukwehlukanise kulokho okungokuka-Aroni namadodana akhe. ₂₈Lezi zinto ziyokuba yisimiso saphakade ku-Aroni namadodana akhe ezivela kuma-Israyeli, ngokuba lokhu kungumnikelo, futhi kuyokuba ngumnikelo wabakwa-Israyeli ovela eminikelweni yabo yokuthula, okungumnikelo kuSimakade.

₂₉“Izingubo ezingcwele zika-Aroni ziyodluliselwa emadodaneni akhe emva kwakhe, ayakugcotshwa, abekwe ngazo. ₃₀Indodana eyokuba ngumphristi esikhundleni sakhe iyozigqoka lezi zingubo izinsuku eziyisikhombisa lapho ingena ethendeni lokuhlangana izokhonza endaweni engcwele.

₃₁“Uyothatha inqama yokugcotshwa, ubilise inyama yayo endaweni engcwele. ₃₂U-Aroni namadodana akhe bayodla inyama yenqama nesinkwa esiseqomeni ngasemnyango wethende lokuhlangana. ₃₃Bona uqobo bayodla ukudla okwenzelwe ukubuyisana ukuze bangcweliswe futhi bahlukaniswe, kodwa akuyukuba khona omunye oyokudla lokhu, ngokuba kungcwele. ₃₄Uma kusale inyama yokugcotshwa noma kusale isinkwa kwaze kwaba sekuseni, kuyokushiswa ngomlilo lokho okuseleyo, kungadliwa, ngokuba kungcwele.

₃₅“Uyokwenza kanjalo ku-Aroni nakumadodana akhe, njengalokhu ngikuyalile; ukubehlukanisa kuyothatha izinsuku eziyisikhombisa. ₃₆Uyonikela futhi nsuku zonke, inkunzi ibe ngumnikelo wesono nowokubuyisana. Uyonikela umnikelo wesono we-althare, nalapho ulenzela umnikelo wokuhlanjululwa, uyoligcoba, ulehlukanise. ₃₇I-althare uyolenzela ukubuyisana izinsuku eziyisikhombisa, ulingcwelise, libe ngcwele kakhulu, ukuze kuthi konke okulithintayo nakho kube ngcwele.”

₃₈“Manje yilokhu oyokunikela e-althare: amawundlu amabili anyaka munye imihla ngemihla. ₃₉Iwundlu elilodwa uyolinikela ekuseni, kuthi elinye ulinikele kusihlwa. ₄₀Iwundlu lokuqala uyolinikela nokweshumi kwempuphu ecolisekileyo, ihlanganiswe nokwesine eshumini kwehini lamafutha agxotshiweyo, nokwesine eshumini kwehini lewayini, kube ngumnikelo wokuphuzwayo. ₄₁Uyonikela ngelinye iwundlu kusihlwa, uyolinikela nomnikelo wokusanhlamvu nowokuphuzwayo njengasekuseni, kube yiphunga elimnandi, umnikelo womlilo kuSimakade.

₄₂“Lowo kuyokuba ngumnikelo wokushiswa imihla ngemihla, izizukulwane ngezizukulwane, oyokwenziwa ngasemnyango wethende lokuhlangana, phambi kukaSimakade, lapho ngiyohlangana nani ukuba ngikhulume nani khona. ₄₃Ngiyohlangana nabantu bakwa-Israyeli lapho, leyo ndawo iyakungcweliswa yinkazimulo yami.

₄₄“Ngiyongcwelisa ithende lokuhlangana ne-althare, ngingcwelise u-Aroni namadodana akhe ukuba bangikhonze bengabaphristi. ₄₅Ngiyohlala phakathi kwabantu bakwa-Israyeli, ngibe nguNkulunkulu wabo. ₄₆Bayokwazi ukuthi nginguSimakade uNkulunkulu wabo, owabakhipha eGibhithe ukuze ngihlale phakathi kwabo; nginguSimakade uNkulunkulu wabo.