I-Eksodusi 26

₁“Uyokwenza ithabanakeli ngamakhethini alishumi enziwe ngelineni elicolekileyo lemicu ephothwe ngokuluhlaza okwesibhakabhaka, okubukhwebezane, nokubomvu. Ingcweti iwahlobise ngamakherubhi. ₂Ubude bekhethini ngalinye bube ngamakhubhithi angama-28, ububanzi balo bube ngamakhubhithi amane. Wonke amakhethini ayakulingana. ₃Amakhethini ayisihlanu ayothungwa ahlanganiswe ndawonye, kanjalo namanye amakhethini ayisihlanu ayothungwa ahlanganiswe ndawonye. ₄Uyokwenza izihibe ngokuluhlaza okwesibhakabhaka emphethweni wekhethini lokuqala, kanjalo nasemphethweni wekhethini lesibili. ₅Uyokwenza izihibe ezingama-50 ekhethinini lokuqala, wenze futhi izihibe ezingama-50 nakwelesibili. Izihibe uyozenza ziqondane. ₆Uyokwenza izinkintsho zegolide ezingama-50 bese amakhethini uwahlanganisa ndawonye ngezinkintsho, ukuze ithabanakeli libe lilodwa.

₇“Uyokwenza amakhethini ngoboya bezimbuzi, abe yithende phezu kwethabanakeli, uyokwenza amakhethini ayi-11. ₈Ubude bekhethini buyoba ngamakhubhithi angama-30, ububanzi balo bube ngamakhubhithi amane. Lawa makhethini ayi-11 kufanele alingane. ₉Uyohlanganisa amakhethini ayisihlanu ndawonye, namakhethini ayisithupha uyakuwahlanganisa ndawonye, bese kuthi ikhethini lesithupha uliphinde kabili phambi kwethende. ₁₀Uyokwenza izinkintsho ezingama-50 emphethweni wekhethini lokuqala elingasekugcineni, nezinye ezingama-50 emphethweni wekhethini lesibili elingasekugcineni. ₁₁Uyokwenza izinkintsho zethusi ezingama-50, ufake amahhuku ezinkintshweni, bese ulihlanganisa ndawonye ithende ukuze libe yinto eyodwa. ₁₂Ingxenye eseleyo yamakhethini ethende, ingxenye yekhethini eliseleyo iyolenga ngemuva kwethabanakeli. ₁₃Ikhubhithi kulolu hlangathi nekhubhithi ngakolunye kwalokho okuseleyo ebudeni bamakhubhithi ethende, kuyakulengiswa emaceleni ethabanakeli kulemboze. ₁₄Ithende uyolenzela isembozo ngezikhumba zezinqama ezidaywe zabomvu, nesembozo sangaphandle ngezikhumba zamahlengethwa.

₁₅“Uyokwenza amapulangwe ethabanakeli ngokhuni lomkhambathi, uwamise. ₁₆Ubude bamapulangwe bube ngamakhubhithi ayishumi, ububanzi balelo nalelo bube yikhubhithi nengxenye. ₁₇Yilelo nalelo pulangwe liyokuba nezikhonkwane ezimbili zokuwaxhumanisa; uyokwenza kanjalo kuwo wonke amapulangwe ethabanakeli. ₁₈Uyokwenza amapulangwe ethabanakeli abe ngama-20 ngasohlangothini lwaseningizimu, olubheke eningizimu. ₁₉Uyokwenza izisekelo zesiliva ezingama-40 phansi kwamapulangwe angama-20, izisekelo ezimbili zibe phansi kwepulangwe lokuqala, ukuze zibambe izimpondo zalo; izisekelo ezimbili ngaphansi kwepulangwe elilandelayo, zibe yizikhonkwane ezimbili; ₂₀nasohlangothini lwesibili lwethabanakeli olungasenyakatho uyomisa amapulangwe angama-20, ₂₁nezisekelo zesiliva ezingama-40, izisekelo ezimbili zibe phansi kwepulangwe lokuqala, ezinye ezimbili zibe phansi kwepulangwe elilandelayo. ₂₂Ohlangothini lwethabanakeli olungasemuva ngasentshonalanga uyomisa amapulangwe ayisithupha. ₂₃Uyokwenza amapulangwe amabili ngasemuva kwethabanakeli abe ngamakhona alo. ₂₄Lawa mapulangwe asemakhoneni kufanele ahlanganiswe kusukela phansi kuze kuyofika phezulu, amapulangwe amabili enza amakhona ayokwenziwa kanjalo nawo. ₂₅Ngakho-ke kuyokuba namapulangwe ayisishiyagalombili anezisekelo zesiliva ezili-16, zibe mbili phansi kwepulangwe ngalinye.

₂₆“Uyokwenza imishayo eyisihlanu ngokhuni lomkhambathi, ibe ngamapulangwe ngakolunye uhlangothi lwethabanakeli, ₂₇imishayo emihlanu ibe ngeyamapulangwe ngakolunye uhlangothi lwethabanakeli, neminye emihlanu ibe ngeyamapulangwe asohlangothini lwethabanakeli olungasemuva ngasentshonalanga. ₂₈Umshayo ophakathi, phakathi kwamapulangwe udabule uze ufinyelele kuzo zombili izinhlangothi. ₂₉Uyowacaka amapulangwe ngegolide, wenze amasongo awo ngegolide, ukuze abambe imishayo, okufanele ukuba nayo icakwe ngegolide.

₃₀“Uyolimisa ithabanakeli ngendlela owakhonjiswa yona entabeni.”

₃₁“Uyokwenza isihenqo ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, ingcweti isihlobise ngamakherubhi. ₃₂Uyosilengisa ezinsikeni ezine zokhuni lomkhambathi ezicakwe ngegolide, ezinezinkintsho zegolide, futhi zimi ezisekelweni ezine. ₃₃Uyolengisa isihenqo phansi kwamahhuku asophahleni, bese ungenisa umphongolo wesivumelwano phakathi kwesihenqo, isihenqo siyakunehlukanisela indawo engcwele nendawo engcwelengcwele. ₃₄Uyakusibeka isihlalo somusa phezu komphongolo wesivumelwano endaweni engcwelengcwele. ₃₅Uyakubeka itafula ngaphandle kwesihenqo, uthi lwezibani ngaseningizimu lethabanakeli lubhekane netafula, ulibeke itafula ngasohlangothini olungasenyakatho.

₃₆“Uyokwenza isihenqo sasemnyango wethende ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, umsebenzi womfekethisi. ₃₇Isihenqo leso uyosenzela izinsika eziyisihlanu ngokhuni lomkhambathi, uzicake ngegolide, nezinkintsho zazo zibe yigolide, uzenzele izisekelo zethusi eziyisihlanu.