UMshumayeli 7

₁Igama elihle lingcono kunamakha anuka kamnandi,

nosuku lokufa lungcono kunolokuzalwa.

₂Kungcono ukuya endlini yabalilayo,

kunokuya endlini lapho kunedili khona,

ngokuba lokho kuyisiphetho sabo bonke,

abaphilayo mabakugcine lokhu enhliziyweni.

₃Usizi lungcono kunokuhleka,

ngokuba ngobuso obudangele inhliziyo iba nokujabula.

₄Inhliziyo yohlakaniphile isendlini yabalilayo,

kodwa inhliziyo yesiwula isendlini yentokozo.

₅Kungcono ukulalela ukusola kohlakaniphileyo,

kunokulalela iculo leziwula.

₆Njengomsindo wokusha kwameva phansi kwebhodwe,

kunjalo ukuhleka kweziwula.

Nalokho kuyize.

₇Impela ukucindezelwa kwenza ohlakaniphile isiwula,

ukufunjathiswa kuyayilutha inhliziyo.

₈Singcono isiphetho sendaba kunesiqalo sayo;

onomoya wokubekezela ungcono kunalowo onowokuzidla.

₉Ungasheshi ukuthukuthela,

ngokuba intukuthelo ihlala ezifubeni zeziwula.

₁₀Ungasho ukuthi:

“Kungani izinsuku zasemandulo

zazingcono kunezanamuhla na?”

Ngokuba lokho kubuza akuveli ekuhlakanipheni.

₁₁Ukuhlakanipha kuhle njengefa,

futhi kusiza labo abasalibona ilanga.

₁₂Ngokuba ukuvikeleka kokuhlakanipha

kufana nokuvikeleka kwemali,

kodwa ubuhle bolwazi nokuhlakanipha

kulondoloza ukuphila kwalowo onakho.

₁₃Bheka umsebenzi kaNkulunkulu;

ngubani ongaqondisa akugobisileyo na?

₁₄Ngosuku lwempumelelo, jabula;

ngosuku lwenhlupheko, qaphela;

nguNkulunkulu ozenzile zombili lezi zinsuku.

Ngakho-ke umuntu ngeke akwazi

ukubona okuyoba khona uma esefile.

umuntu oqotho efela ebuqothweni bakhe,

nomuntu omubi ephila

isikhathi eside ebubini bakhe.

₁₆Ungabi ngolunge kakhulu,

ungazenzi ohlakaniphe ngokwedlulele;

uzibhubhiselani na?

₁₇Ungabi ngokhohlakele kwaze kweqa,

noma oyisiwula;

ufunelani ukufa kungakabi yisikhathi sakho na?

₁₈Kuhle ukuthi ukubambe lokhu;

ungasisusi isandla sakho kukho,

ngokuba owesaba uNkulunkulu

uyaphumelela kukho konke.

₁₉Ukuhlakanipha kuletha amandla kumuntu ohlakaniphile,

edlule ababusi abalishumi abasemzini.

₂₀Impela emhlabeni akekho umuntu

owenza okulungile kodwa,

ongoni ngalutho.

₂₁Ungayibeki inhliziyo yakho

kukho konke okushiwo ngabantu,

funa uzwe inceku yakho ikuqalekisa.

₂₂Inhliziyo yakho iyazi

ukuthi nawe uhlale ubaqalekisa abanye.

“Ngizohlakanipha,”

kodwa ukuhlakanipha kwaba kude nami.

₂₄Okusemajukujukwini nokusekujuleni,

ngubani ongakufumana na?

₂₅Umqondo wami ngawuguqulela ekwazini

ekufuneni, nasekuphenyisiseni izinto zonke,

nokwazi ububi bobuwula,

nokuthi ubuwula bungukuhlanya.

₂₆Ngathola okumuncu okwedlula ukufa:

owesifazane onenhliziyo ewugibe nenethi,

ozandla zakhe ziyizibopho;

othokozisa uNkulunkulu uyasinda kuye,

kodwa isoni uyasibamba.

₂₇“Yilokhu-ke engikutholile,”

kusho uMshumayeli.

“Ngihlanganisa lokhu nalokhu

ukuze ngithole umphumela,

₂₈ingqondo yami esiwucinge iphindelela,

kodwa ingawufumani.

Ngathola indoda eyodwa phakathi kwayinkulungwane,

kodwa angimtholanga owesifazane

phakathi kwakho konke lokho.

₂₉Yilokhu kodwa engakuthola,

ukuthi uNkulunkulu wabenza abantu baba qotho,

kodwa bona bazisungulela amaqhinga amaningi.”