IDutheronomi 33

“USimakade weza evela eSinayi,

wabakhanyisela evela eSeyiri,

wakhazimula entabeni iPharanu.

Weza nezigidi zabangcwele;

ebaphathele umthetho ovuthayo

esandleni sakhe sokunene.

₃Yebo, uyazithanda izizwe,

bonke abangcwele bakhe

basesandleni sakho;

baholelwe ngasezinyaweni zakho,

bayakwemukela okwamazwi akho.

₄UMose wasinika umthetho,

waba yifa lenhlangano kaJakobe.

₅USimakade waba yinkosi eJeshuruni,

ngesikhathi izinhloko zabantu ziqoqana ndawonye,

nezizwana zakwa-Israyeli

zabuthanela ndawonye.

₆“Sengathi uRubeni angaphila, angafi;

amadodana akhe ande kakhulu.

₇“Washo lokhu ngoJuda:

‘Yizwa, Simakade,

yizwa izwi likaJuda,

umlethe kwabakubo;

izandla zakho zimlwele,

umsize kwabamelene naye.’

₈“NgoLevi wathi:

‘IThumimi lakho ne-Urimi lakho

makuye kothembekileyo wakho,

owamvivinya eMasa,

owaphikisana naye ngasemanzini eMeribha,’

₉owathi ngoyise nonina:

‘Angibabonanga,’

wangabanaka abafowabo,

akaze abanakekela abantwana bakhe.

Ngokuba baligcina izwi lakho,

basigcina isivumelwano sakho.

₁₀Bafundisa uJakobe izehlulelo zakho,

no-Israyeli umthetho wakho;

babeka impepho phambi kwamakhala akho,

nomnikelo oshiswa wonke e-althare lakho.

₁₁Busisa, Simakade, amandla akhe,

uyamukele nemisebenzi yezandla zakhe.

Labo abamvukelayo bafihlize izinkalo zabo,

nezalabo abamzondayo,

ukuze bangaphindi bavuke.

₁₂“NgoBhenjamini wathi:

‘Othandiweyo kaSimakade

uyakuhlala elondwa nguye;

uyamsibekela usuku lonke,

ahlale phakathi kwamahlombe akhe.’

₁₃“NgoJosefa wathi:

‘Izwe lakhe malibusiswe nguSimakade

ngamagugu asezulwini, ngamazolo,

ngotwa olwenabileyo phansi,

₁₄ngamagugu ezithelo zelanga,

ngamagugu esivuno senyanga,

₁₅ngezinto ezinqabileyo zezintaba zasemandulo,

ngamagugu amagquma angunaphakade,

₁₆ngamagugu omhlaba nokugcwala kwawo,

nangentando enhle yowabonakala esihlahleni;

isibusiso masehlele ekhanda likaJosefa

nasemqheleni wekhanda

lalowo owehlukaniswa nabafowabo.

₁₇Izibulo lenkunzi yakhe,

udumo lwakhe,

nezimpondo zenyathi ziyizimpondo zakhe;

ngazo uyakuqhubukusha

izizwe zonke ekugcineni komhlaba;

zinjalo izigidi zakwa-Efrayimi,

zinjalo izinkulungwane zakwaManase.’

₁₈“NgoZebuloni wathi:

‘Yenama, Zebuloni, ekuphumeni kwakho,

nawe Isakhare, emathendeni akho.

₁₉Bayobizela izizwe entabeni,

lapho bayonikela imihlatshelo yokulunga,

ngokuba bayoncela inala yezilwandle,

nengcebo yesihlabathi efihliweyo.’

₂₀“NgoGadi wathi:

‘Makabusiswe owandisa uGadi:

uhlezi njengengonyama,

udwengula ingalo nomqhele okhakhayini.

₂₁Wazikhethela isabelo sekhethelo,

ngokuba sasigodlwe lapho isabelo somehluleli;

wahamba nabaholi babantu,

wafeza ubulungiswa bukaSimakade

nezehlulelo zakhe ngo-Israyeli.’

₂₂“NgoDani wathi:

‘UDani uyibhongo lengonyama,

elitshakadulayo, liphuma eBhashani.’

₂₃“NgoNafethali wathi:

‘Nafethali, ugcwele umusa,

ugcwele isibusiso sikaSimakade:

uyakudla intshonalanga neningizimu.’

₂₄“Ngo-Asheri wathi:

‘Ubusisiwe u-Asheri ngaphezu kwabafowabo,

makafumane umusa kubafowabo,

unyawo lwakhe alucwilise emafutheni.

₂₅Imigoqo yakho ingeyensimbi nethusi,

njengoba zinjalo izinsuku zakho;

ayoba njalo namandla akho.’

₂₆“Akekho ofana noNkulunkulu, Jeshuruni,

ogibela amazulu ukuzokusiza,

namafu ngobukhosi bakhe.

₂₇UNkulunkulu wasemandulo uyisiphephelo

nangaphansi zikhona izingalo ezingunaphakade;

wazixosha izitha phambi kwakho

wathi: ‘Bhubhisa.’

₂₈U-Israyeli uhleli ngokuvikeleka;

umthombo kaJakobe wehlukene wodwa

ezweni lokusanhlamvu nelewayini;

lapho amazulu akhe econsa amazolo.

₂₉Ubusisiwe wena Israyeli;

ngubani ofana nawe,

isizwe esisindiswe nguSimakade

oyisihlangu nosizo lwakho,

oyinkemba yakho yokunqoba.

Izitha zakho ziyokhwantshabala,

wena unyathele ezindaweni zazo eziphakemeyo.”