2 AMakhosi 13

₁Ngonyaka wama-23 wokubusa kukaJowashi, indodana ka-Ahaziya, inkosi yakwaJuda, uJehowahazi, indodana kaJehu, waba yinkosi kwa-Israyeli, wabusa eSamariya iminyaka eli-17. ₂Wenza okubi phambi kukaSimakade, wenza izono ezenziwa nguJerobhowamu, indodana kaNebhathi, onisa ngazo u-Israyeli; akachezukanga kuzo. ₃Intukuthelo kaSimakade yamvuthela u-Israyeli, wayesemnikela esandleni sikaHazayeli, inkosi yase-Aramu, nasesandleni sikaBheni Hadadi, indodana yakhe, sonke leso sikhathi.

₄UJehowahazi wamnxusa uSimakade, uSimakade wamuzwa. USimakade wabona ingcindezelo inkosi yase-Aramu eyayicindezele ngayo u-Israyeli. ₅USimakade wanika u-Israyeli umkhululi; base bekhululeka phansi kwesandla sama-Aramu, abantu bakwa-Israyeli bahlala emathendeni abo njengakuqala. ₆Nokho abaphendukanga ezonweni zendlu kaJerobhowamu onisa ngazo u-Israyeli; bahamba ngazo, u-Ashera abaze bamsusa eSamariya.

₇Akashiyanga muntu kuJehowahazi, kuphela impi eyayingevile kwabamahhashi abangama-50, izinqola zempi ezilishumi namabutho ahamba ngezinyawo ayizi-10 000, ngokuba inkosi yase-Aramu yayibaqothe bafana nothuli esibhulweni.

₈Ezinye izindaba zikaJehowahazi, nakho konke akwenzayo, namandla akhe, akulotshiwe yini encwadini yezindaba zemihla ngemihla yamakhosi akwa-Israyeli na? ₉UJehowahazi walaliswa kokhokho bakhe, wembelwa kwabakubo eSamariya, uJowashi waba yinkosi esikhundleni sakhe.

₁₀Ngonyaka wama-37 wokubusa kukaJowashi, inkosi yakwaJuda, uJehowashi, indodana kaJehowahazi, waba yinkosi kwa-Israyeli eSamariya; wabusa iminyaka eli-16. ₁₁Wenza okubi emehlweni kaSimakade, akachezukanga kuzo zonke izono zikaJerobhowamu, indodana kaNebhathi, onisa ngazo u-Israyeli, wahamba kuzo. ₁₂Ezinye izindaba zikaJowashi, nakho konke akwenzayo, namandla akhe alwa ngawo no-Amaziya, inkosi yakwaJuda, akulotshiwe yini encwadini yezindaba zemihla ngemihla yamakhosi akwa-Israyeli na? ₁₃UJowashi walaliswa kokhokho bakhe; uJerobhowamu wahlala esihlalweni sakhe sobukhosi; uJowashi wembelwa eSamariya namakhosi akwa-Israyeli.

₁₄U-Elisha wagula ngesifo esagcina simthathile. UJowashi, inkosi yakwa-Israyeli, wehla waya kuye, wakhala kakhulu, wathi: “Baba, Baba, inqola ka-Israyeli nabamahhashi bakhe!”

₁₅U-Elisha wathi kuye: “Thatha umnsalo nemicibisholo.”

Wayesekuthatha-ke. ₁₆U-Elisha wathi enkosini yakwa-Israyeli: “Beka-ke isandla sakho emnsalweni.”

Wenza kanjalo, wawubamba ngesandla sakhe. U-Elisha wayesebeka isandla sakhe phezu kwezandla zenkosi.

₁₇Wathi kuyo: “Vula ifasitela elingasempumalanga.”

Yalivula. U-Elisha wathi: “Ciba,” yayisiwuciba.

Wayesethi u-Elisha kuyo: “Lo ngumcibisholo kaSimakade wokunqoba, ngumcibisholo ozonenza ninqobe kuma-Aramu, ngokuba uyakuwabulala ama-Aramu, uwaqede e-Afeki.”

₁₈Wayesethi: “Thatha imicibisholo.”

Yayithatha-ke. Wathi enkosini yakwa-Israyeli: “Shaya emhlabathini.”

Yashaya kathathu, yayeka. ₁₉Umuntu kaNkulunkulu wayithukuthelela inkosi, wathi: “Ukuba ubushaye kahlanu noma kayisithupha, i-Aramu ubuzolehlula uliqede nya, kodwa manje uyakulehlula kathathu kuphela.”

₂₀U-Elisha wafa, bammbela. Kwakuthi ngokwethwasa konyaka, izwe lihlaselwe ngamaviyo akwaMowabi. ₂₁Kwathi-ke besambela umuntu othile; bheka, babona iviyo liza; bamlahla lowo muntu ethuneni lika-Elisha. Kwathi lapho isidumbu sakhe sithinta amathambo ka-Elisha, waphila, wema ngezinyawo zakhe.

₂₂Kepha uHazayeli, inkosi yase-Aramu, yayimcindezele u-Israyeli zonke izinsuku zikaJehowahazi. ₂₃USimakade wayenomusa kubo; wayenesihe kubo, waphendukela kubo ngenxa yesivumelwano sakhe no-Abhrahama, no-Isaka noJakobe, akathandanga ukubabhubhisa, futhi akabalahlanga ebusweni bakhe.

₂₄UHazayeli, inkosi yase-Aramu, wafa; uBheni Hadadi, indodana yakhe, waba yinkosi esikhundleni sakhe. ₂₅UJehowashi, indodana kaJehowahazi, wamephuca uBheni Hadadi, indodana kaHazayeli, leyo mizi ayekade eyidle empini kusabusa uyise, uJehowahazi. UJowashi wamehlula kwaze kwaba kathathu, wayibuyisa imizi yakwa-Israyeli.