2 KwabaseKhorinte 9

₁Mayelana nokukhonza abangcwele, akuswelekile ukuba nginilobele, ₂ngokuba ngiyayazi intshisekelo yenu engihlala nginitusa ngayo kwabaseMakhedoniya, ukuthi abase-Akhaya bazilungiselele kusukela nyakenye ukunikela, nokuthi ugqozi lwenu lugqugquzele abaningi. ₃Kepha ngithume abazalwane ukuba ukuzincoma kwethu ngani kungaphenduki kube yize maqondana nalokhu, ukuze, njengalokhu bengisho, nibe senizilungisele, ₄funa uma sengifika nabaseMakhedoniya banifumane ningazilungiselele, bese siyaphoxeka singasakwazi ukunitusa ngalo msebenzi. ₅Ngakho ngikubona kudingeka ukuba ngibagqugquzele abazalwane ukuba bahambe beze kini kuqala, ukuze balungisele kuqala lesi sipho nesibusisekile kangaka esethenjiswa sona phambilini, ukuze sihlale silungisiwe, sibe yisibusiso, singabi njengesokuncishana.

₆Kepha nakhu: ohlwanyela ingcosana uyakuvuna ingcosana, nohlwanyela kakhulu uyakuvuna kakhulu. ₇Ngakho-ke yilowo nalowo makanikele njengalokhu enqumile enhliziyweni, kungabi ngokudabuka noma ngokucindezelwa, ngokuba uNkulunkulu uyamthanda onikela ethokoza. ₈UNkulunkulu unamandla okuninika umusa wonke uchichime, ukuze nithi ninokwaneleyo ngezikhathi zonke, nichichime emisebenzini yonke emihle. ₉Njengokuba kulotshiwe ukuthi:

₁₀Kepha lowo onika ohlwanyelayo inhlwanyelo nesinkwa sokudliwa, uyakuninika ngokuphindiwe inhlwanyelo yenu, aphinde andise isivuno sokulunga kwenu, ₁₁ukuze nithi nicetshisiwe kokuningi nibe ngabaphanayo, okuyakuveza ngathi ukubonga uNkulunkulu.

₁₂Ngokuba ukukhonza ngale nkonzo, akuqedi nje ukweswela kwabangcwele, kodwa kwenza ukuba kuvame ukubonga uNkulunkulu kwabaningi. ₁₃Ngokuvivinyeka kwale nkonzo, abantu badumisa uNkulunkulu ngenxa yokulalela, nangokuvuma kwenu ivangeli likaKhristu, nangenxa yokuphana kubo, nakubo bonke abanye, ₁₄benilangazelela; bayanikhulekela ngenxa yomusa kaNkulunkulu okini omkhulu kakhulu. ₁₅Makabongwe uNkulunkulu ngenxa yesipho sakhe esingachazekiyo.