1 KwabaseKhorinte 16

₁Maqondana nomnikelo oqoqelwa abangcwele, njengalokhu ngawayala amabandla aseGalathiya, nani-ke yenzani kanjalo. ₂Ngosuku lokuqala lweviki akube yilowo nalowo azibekele, aqongelele azakunikela ngakho njengokuphumelela kwakhe, ukuze kuthi lapho ngifika, kungabi yima kuqalwa kuqoqwa umnikelo. ₃Kuyakuthi ekufikeni kwami, ngithumele eJerusalema labo enibaqokileyo, bephethe izincwadi, baziyise izipho zenu zothando. ₄Uma nami kufanele ukuba ngihambe, ngiyakuhamba nabo.

₅Ngiyakuza kini uma sengedlulile eMakhedoniya, ngokuba ngiyakudlula khona eMakhedoniya. ₆Mhlawumbe kungenzeka ngihlale nani isikhathi esithile, noma kuze kwedlule ubusika, ukuze ningiqhube ohambeni lwami noma kuphi lapho ngiya khona. ₇Ngokuba manje angithandi ukunibona ngedlula, lokhu ngithemba ukuthi ngizakuhlala nani isikhathi, uma iNkosi ivuma. ₈Kepha ngizakuhlala e-Efesu, kuze kufike umkhosi wePhentekhoste, ₉ngokuba ngivulelwe umnyango omkhulu wethuba lokusebenza; nakuba bebaningi abamelene nami.

₁₀Uma uThimothewu efika lapho, anoqikelela ukuba ahlale nani engenalo uvalo, ngokuba naye usebenza umsebenzi weNkosi njengami, ₁₁ngakho-ke makungabi bikho omedelelayo. Uma esehamba anomkhapha ngokuthula endleleni, ngokuba ngimlindele yena nabazalwane.

₁₂Maqondana nomzalwane u-Apholo, ngamncenga kakhulu ukuba eze kini nabazalwane, kodwa kwakungesiyo intando yakhe ukuba eze manje. Kepha uyakuza kini uma esethole ithuba.

₁₃Lindani, nime niqinile ekukholweni, nime isibindi, nibe namandla. ₁₄Konke enikwenzayo, kwenzeni ngothando.

₁₅Ngiyanincenga manje bazalwane, niyazi ukuthi indlu kaStefana iwulibo lokuqala lwase-Akhaya, nokuthi bazinikela ukuba basize abangcwele, ₁₆ukuba nibathobele abanjalo nabo bonke abasebenzisana nabo bezikhandla. ₁₇Ngiyathokoza ngokufika kukaStefana, uFortunatu no-Akhayiku, lokhu basivalile isikhala sokungabi bikho kwenu lapha. ₁₈Ngokuba bawuvuselele umoya wami nowenu, ngakho-ke basizeni abantu abanjalo.

₁₉Ayakhonza kini amabandla ase-Asiya. U-Akhwila, uPhriska kanye nebandla elisendlini yabo, bayakhonza kakhulu kini eNkosini. ₂₀Bonke abazalwane bayakhonza kini. Bingelelanani ngokwangana okungcwele.

₂₁Nanku umkhonzo wami, mina Pawula, engiwuloba ngesandla sami.

₂₂Uma umuntu engayithandi iNkosi, makabe ngoqalekisiweyo. Woza, Nkosi yethu!

₂₃Umusa weNkosi uJesu mawube nani.

₂₄Uthando lwami malube nani nonke kuKhristu uJesu.