IINDUMISO 78

₁Khaniyibekel' iindlebe, mawethu, imfundiso yam;

khanindiph' iindlebe ndithethe.

₂Ndiza kuthetha nani ngemizekeliso;

ndiza kuphokoz' iintsonkotha zamandulo.

₃Ndixel' izinto esazivayo nesizaziyo,

izintw' esazixelelwa ngoobawo.

₄Asinako ukubafihlela abantwana babo,

koko sozibhengeza kwizizukulwana ezizayo:

imisebenzi emihle *kaNdikhoyo namandla akhe,

ewe, nditsho nemimangaliso ayenzileyo.

₅Wamisela umthetho kwaYakobi,

wanikela imimiselo kwaSirayeli;

wabanqonqozisa ngayo oobawo,

ukuze bafundise abantwana babo,

₆khon' ukuze ziyazi izizukulwana ezizayo,

ewe, nditsho nabangekalibon' ilanga.

Bona ke bayigqithisele kubantwana babo,

₇ukwenzela ukuba bakholose ngoThixo,

bangaze bayilibale imisebenzi yakhe,

koko bayithobele imimiselo yakhe;

₈ewe, bona bangafuzi ooyise,

isizukulwana esineenkani nesigwilikayo,

abantu abantliziyo zibhetyebhetye,

abangazange banyaniseka kuThixo.

₉AmaEfrayim axhoba ngeentolo,

engàxhob' ef' amacala,

kodwa aswantsula ngomhla wedabi.

₁₀Akawuthobelanga umnqophiso kaThixo,

asuka ala ukuhamba ngokomthetho.

₁₁Suke ayilibala imisebenzi yakhe,

imiqondiso awayewabonise yona.

₁₂UThixo wenza imimangaliso phambi kooyise,

eJiputa kumathafa aseZowan.

₁₃Walahlula-hlula ulwandle, bawela,

amanzi aba yinduli ngapha nangapha.

₁₄Wabakhokela ngelifu emini,

ebusuku wabakhokela ngomlilo.

₁₅Waqhekeza amawa entlango,

basela amanzi ampompozayo.

₁₆Wavelisa imithombo elulwalweni,

amanzi aqukuqela ngathi yimilambo.

₁₇Kodwa baphindelela ukona,

bavukelana naye uPhezukonke entlango.

₁₈Bamvavanya ngabom uThixo

ngokubiza ukutya ababekubawela.

₁₉Baphoxisa ngoThixo bathi:

“Angakuthatha phi na ukutya apha entlango?

₂₀Ewe, waliqhekeza iliwa, antyunty' amanzi,

kwaza kwagqobhoza imilambo.

Ewe, makasinik' isonka kaloku,

abaph' inyama abantu bakhe.”

₂₁Akuyiva le nto uNdikhoyo wacaphuka,

waza wamlenya ngomlilo uYakobi.

Ewe, wanoburhalarhume kuSirayeli,

₂₂kuba bengakholosanga ngoThixo,

bengathembanga ukuba angabasindisa.

₂₃Kambe ke wayalela isibhakabhaka,

zaza zavuleka iingcango zezulu,

₂₄yaza *imana yawa njengemvula,

wabanika batya ukutya kwaphezulu.

₂₅Ewe, abantu batye ukutya kwezithunywa zezulu,

baza batya bada bahlutha.

₂₆Wathumela umoya wasempuma wabhudla,

ngamandla akhe wavusa umoya wasezantsi.

₂₇Wabathobela inyama,

kwangathi sisivungu-vungu;

inyambalala yeentaka ezingangentlabathi yolwandle

₂₈waziwisa apho babemise khona,

ewe, zajikeleza iintente zabo.

₂₉Abantu batya bada bahlutha;

kaloku wabanika loo nto babeyifuna.

₃₀Kanti ke bathe bengekadikwa,

besaxakekile besatya njalo,

₃₁suka wavutha umsindo kuThixo,

wababulala abona bomeleleyo,

wabageqa abafana bakwaSirayeli.

₃₂Nakuba kunjalo baphikelela ukona,

bangenelwa kukudelela, àbakholwa.

₃₃Waza ke wababhangisa okomphunga,

imihla yabo yaphela lishwangusha.

₃₄Akubohlwaya babuyela kuye,

baguquka bazinikela kuThixo.

₃₅Bakhumbula ukuba nguThixo inqaba yabo,

bangáhlangulwa nguThixo uPhezukonke.

₃₆Kodwa kuloo nto yonke bamqhatha;

bâthi: “Lala, gusha, ndikuchebe.”

₃₇Zabe iintliziyo zona zikude lee kuye,

bengakhange bawunanze umnqophiso wakhe.

₃₈Kambe ke yena uThixo waba nenceba,

wabaxolela iziphoso zabo,

wazibamba akabatshabalalisa;

ewe, wayewubamba futhi umsindo wakhe,

wayithomalalisa ingqumbo yakhe.

₃₉Wakhumbula ukuba bangabantu,

into edlula njengomoya iphele.

₄₀Kwaba kaninzi bemvukela entlango;

ewe, babemtsho abe neenzingo kwelingamiwayo.

₄₁Baphinda-phinda ukumvavanya,

bamcaphukisa oyiNgcwele kaSirayeli.

₄₂Bamlibala àbamkhumbula ngamandla akhe,

bawulibala umhla wokuhlangulwa kwabo elutshabeni.

₄₃Abayikhumbulanga imiqondiso yakhe yaseJiputa,

nemimangaliso yakhe kumathafa aseZowan,

₄₄apho wawajika khona amanzi aba ligazi,

kwayinqaba kumaJiputa ukusela emithonjeni.

₄₅Wabathumela ngamabubu eempukane, zabangcungcuthekisa,

ngokunjalo namasele abazisela imbubho.

₄₆Izilimo zabo wazithumela ngesihlava,

isivuno sabhuqwa ziinkumbi.

₄₇Idiliya yabo wayivuthulula ngesiphango,

ke wona amakhiwane wawarhawula ngeqabaka.

₄₈Iinkomo zabo wazintlitha ngesichotho,

imihlambi yabo yalenywa yimibane.

₄₉Wasuka ke wavutha umsindo wakhe,

wayivulela ingqumbo yakhe ecaphukile,

wababandezela ngolunya,

umkhosi wezithunywa wabatshabalalisa.

₅₀Zange abe sazibamba, wawuvulela umsindo wakhe,

akabasindisa ekufeni;

ewe, wasuka wabathumela ngobhubhani.

₅₁Wawathi qwaka onke amazibulo amaJiputa,

wabageqa abaligugu neqhayiya lakwaHam.

₅₂Kanti ke wabakhokela njengeegusha abantu bakhe,

entlango wabalusa ngathi ngumhlambi.

₅₃Wabalondoloza batsho baphelelwa ngamaxhala,

kambe ke ulwandle lwaziginya iintshaba zabo.

₅₄Wabakhokela wabasa kwelilelakhe ilizwe,

entabeni awayizuza ngamandla akhe.

₅₅Bakufika wazidudula izizwe zabhaca,

abantu bakhe wabacandela umhlaba wazo,

amaSirayeli athi zava ezikhundleni zazo.

₅₆Kanti ke bamlinga bamvukela uThixo uPhezukonke;

ewe, abazange bawuthobele umthetho wakhe.

₅₇Bamvukela, bahamba ngobutshijolo booyise;

basuka àbanyaniseka, àbathembeka okwesaphetha esityokololo.

₅₈Bamcaphukisa ngokukodwa ngokunqula izithixo,

bamkhweletisa ngemifanekiso ababeyinqula.

₅₉Akuyibona le nto uThixo waqumba

kangangokuba wasuka wamhlamba uSirayeli.

₆₀Ewe, wafuduka emzini wakhe eShilo,

wayishiya indlu awayehlala kuyo phakathi kwabantu.

₆₁Wabayekela yathinjwa ityesi yomnqophiso,

iqhayiya labo lemka notshaba.

₆₂Abantu bakhe baba zizisulu zekrele,

ilifa lakhe waliqwenga ngengqumbo.

₆₃Abafana batshayelwa ngumlilo,

zatsho iintombi zaphoswa ngumtshato.

₆₄Ababingeleli bageqwa likrele,

kodwa abahlolokazi babo àbalila.

₆₅INkosi yathi khwaphuphu njengobelele,

njengegorha elishushiswa yiwayini.

₆₆Wazikhaba iintshaba zakhe,

zatsho zaxabheleka umlibe.

₆₇Wayilahla indlu kaJosefu,

wayibukula indlu kaEfrayim.

₆₈Kodwa wayichonga indlu kaJuda,

intaba iZiyon ayithandayo.

₆₉Wayakha yafana nezulu indlu yakhe;

ikhaya lakhe sisimakade, linjengomhlaba.

₇₀Wasinyula isicaka sakhe uDavide,

wasiphuthuma ekwaluseni.

₇₁Wamkhupha ekwaluseni amatakane,

wamenza umalusi wabantu bakhe,

wangumalusi kaSirayeli ilifa lakhe.

₇₂Wabalusa ngokuzimisela nangenyameko;

ewe, wabakhokela ngobuchule.