IINDUMISO 44

₁Ewe kambe, sizivele ngezethu iindlebe, Thixo.

Kaloku amanyange asibalisela

ngezigigaba zakho zemihla yawo yamfamlibe.

₂Wena wazigxotha iintlanga,

waza bona abantu bakho wabamilisela elizweni lazo.

Wazitshutshisa iintlanga

waza bona abakho wabathi jize ngenkqubela.

₃Hayi, eli lizwe abalizuzanga ngenxa yezikhali,

bengaphumelelanga ngenxa yezigalo zabo;

koko kwakungenxa yegunya nezigalo zakho

nefuthe lobukho bakho, njengoko babethandeka kuwe.

₄Wena unguKumkani noThixo wam.

Lumiselwa nguwe uloyiso lwakwaYakobi.

₅Ngoncedo lwakho siyazingqula iintshaba zethu;

ngegama lakho siyabaxovula abasihlaselayo.

₆Andixhomekekanga kolwam utolo,

ndingaqamelanga ngalo nekrele.

₇Hayi, nguwe owasihlangulayo ezintshabeni zethu;

ikwanguwe owabaduba-dubayo abasithiyileyo.

₈Thina siqhayisa ngoThixo njalo-njalo,

saye siya kumdumisa nanini-nanini.

₉Kambe ke usilahle satsho sahlazeka,

njengoko ungasaphumi nemikhosi yethu.

₁₀Wena usiyekele zasiswantsulisa iintshaba,

zaza zathimba amaxhoba ngokuthanda kwazo.

₁₁Wena usiyekele saxhelwa njengeegusha;

usithathe wasisarhaza phakathi kweentlanga.

₁₂Abantu bakho wabathengisa ngelize,

wena akwafumana nzuzo ngabo.

₁₃Usenze intsini kubamelwane,

satsho sasisigculelo nesenyeliso

kwezo zizwe zisingqongileyo.

₁₄Ngoku singundaba-mlonyeni phakathi kwezizwe;

sesingabasizelwayo kulo lonke elimiweyo.

₁₅Ndisoloko ndithiwe mbende lihlazo.

Ke zona iintloni zindongamele

₁₆ngenxa yempoxo nezenyeliso

ezigityiselwa kum ziintshaba ezindivukeleyo.

₁₇Zonke ezi zinto zasihlela,

nangona singazange sakulibala thina,

okanye siwutshinizele umnqophiso wakho.

₁₈Asizange sikufulathele thina,

singazange sanxaxha endleleni yakho.

₁₉Kodwa elethu linyhashwe laba linxuwa,

silahlwe esithokothokweni sobumnyama.

₂₀Ukuba besikutyeshele, wena Thixo,

okanye sanqula thixo bambi,

₂₁andithi, wena Thixo, ubuya kuyibhaqa na naleyo?

Kaloku wena uyabazi ubunzulu beentliziyo.

₂₂Kambe ke kungenxa yakho sisesichengeni sokubulawa nje;

yiyo loo nto sesifana neegusha zokuxhelwa nje.

₂₃Hayi bo! Vuka, Nkosi yam!

Ngani ukuba uthurh' obentlombe?

Vuka; sukusinyengez' uhle nomcinga!

₂₄Ngan' ukuba usilibale kangaka?

Ngan' ukuba usifulathele ngolu hlobo,

sibe sisisulu sembandezelo nengcinezelo?

₂₅Ewe, asisazelwe nto konke;

sesingoogqush' eluthulini.

₂₆Ngenxa yothando lwakho olungatshitshiyo

khawuvuke usihlangule kaloku!