IINDUMISO 35

₁*Ndikhoyo, ndilamlele kwabo bandivuyelelayo,

undilwele kwabo balwa nam.

₂Qubula ikhaka lakho nesikrweqe sakho,

undincede undilamlele.

₃Wurhole umkhonto nentshuntshe yakho,

ubavalele indlela abo bandileqayo,

uthi kum: “Ndim umhlanguli wakho.”

₄Mabahlazeke, badane abandizungulayo;

mabajike bedidekile abo bandenzela amayelenqe.

₅Mababe njengenkunkuma ephetshethwa ngumoya,

sibaqweqwedise isithunywa sikaNdikhoyo.

₆Mayingacaci indlela yabo, mayibe mtyibilizi;

masibasukele isithunywa sikaNdikhoyo.

₇Kaloku bebendigcayisele ndingenzanga nto,

befun' ukunditshonisa emhadini kungekho sizathu.

₈Mabatshabalale ngequbuliso bengekaqondi,

barhintyelwe nguloo mgibe bebendigcayisele ngawo,

beyele kuwo, batshabalale.

₉Ndovuya ke, ndichulumache,

kuba uNdikhoyo undihlangule.

₁₀Ndothi ngomxhelo wonke: “Akakho onjengawe, Ndikhoyo.”

Wena uhlangula iindwayi kwabanamandla kunazo,

ukhusele indwayinge kubacinezeli.

₁₁Kuvele amangqina athetha ulwimi ngam,

andinkqangisa ngezinto endingazaziyo;

₁₂andibuyekeza ubuhle ngobubi,

ndatsho ndaphelelwa lithemba.

₁₃Kodwa mna, okuya babegula, ndambatha ezirhwexayo,

ndazicinezela nangokuzila ukutya, ndithandaza ngentobeko.

₁₄Ndangathi ndithandazela umhlobo wam nomntakwethu;

ndathokombisa intloko ngokungathi ndizilela umama.

₁₅Ndithe ke ndakuba sengxakini,

baqokelelana bandihleba,

ndanyeliswa nazizinto endingazaziyo.

₁₆Bandenza intlekisa, bandingcungcuthekisa,

bendijamela ngentiyokazi enkulu.

₁₇Koda kube nini na kodwa ubukele, Ndikhoyo?

Nceda ndihlangule kwabandiqwengayo;

busindise ubomi bam kwezi ngonyama.

₁₈Ndokubonga phakathi kwebandla,

ndikuncome esidlangalaleni.

₁₉Mazingandivuyeleli ngobuxoki iintshaba zam,

bangandisinekeli abo bandithiya ndingenatyala.

₂₀Bona abathethi ngemibandela yoxolo,

koko bayila ubuxoki ngabathand' uxolo.

₂₁Bandivuyelela besithi: “Heke! Sikubhaqile!”

₂₂Ndikhoyo, nguwe ingqina lam, mus' ukuthi tu!

Nkosi yam, mus' ukuchasela!

₂₃Lamla, Nkosi, ndiphendulele;

Thixo wam, ndithethelele!

₂₄Ndikhoyo, Thixo olilungisa, ndigwebele;

mazingandinyevuleli iintshaba zam.

₂₅Mazingandigcolotheli zithi: “Nantso ke!

Simgqibile ngoku!”

₂₆Mabadane badideke abavuyiswa yinkxwaleko yam;

mabadane baphoxeke abazikhukhumalisayo.

₂₇Makube yimincili kwabo bafuna ndigwetyelwe;

mabamemelele bathi: “Makabongwe uNdikhoyo,

yena ofuna impumelelo yesicaka sakhe.”

₂₈Ke mna ndovakalisa ukulunga kwakho,

ndikubonge imini yonke.