IINDUMISO 13

₁Koda kube nini na, *Ndikhoyo, undilibele kwaphela?

Koda kube nini na ndingakuboni?

₂Koda kube nini na ndinomva-ndedwa,

ndinesingqala, ibuhlung' imini yonke intliziyo yam?

Koda kube nini zindivuyelel' iintshaba zam?

₃Bek' iindlebe, Ndikhoyo, undive, Thixo wam.

Ndihlaziye, hleze ndilal' ubuthongo bokufa,

₄hleze luthi lundoyisil' utshaba lwam,

bachwayit' ababandezeli, kuba ndoyisiwe.

₅Kodwa ndithembe uthando lwakho olungajikiyo;

ndochulumacha kuba uyandihlangula.

₆Ndombonga uNdikhoyo, kuba endiphethe ngobubele.