ULUKA 24

₁Kwakusekusasa ngeCawe ukunduluka kwâbo bafazi besiya engcwabeni, bephethe iziqholo ababezilungisile. ₂Balifumana ilitye liqengqiwe, lisusiwe engcwabeni. ₃Bakuba bengenile, abawufumananga umzimba weNkosi uYesu. ₄Kwathi, besakhohliwe yile nto, kwathi gqi amadoda amabini ngakubo, enezambatho ezibengezelayo. ₅Basuka boyika abafazi, baqondela phantsi, aza athi loo madoda: “Yini na ukuba ophilayo nimfune kwabafileyo? [ ₆Akakho apha, uvukile.] Khumbulani awakuthetha kuni esekwelaseGalili, ₇esithi: ‘*UNyana woLuntu umelwe kukunikelwa ezandleni zaboni, abethelelwe emnqamlezweni, athi ngomhla wesithathu abuye avuke.’ ”

₈Bawakhumbula ke amazwi akhe. ₉Bebuyile engcwabeni abafazi abo bazixela zonke ezo zinto kubafundi abalishumi elinanye nakubo bonke abanye. ₁₀YayinguMariya waseMagadala, noYohana, noMariya unina kaYakobi, nabanye abafazi ababenabo, abazixeláyo ezi zinto *kubathunywa. ₁₁Kubafundi oku kuthethwa ngaba bafazi kwaba ngathi kukulavuza, baza abakholwa. [ ₁₂Kodwa yena uPetros usuke wabaleka, waya engcwabeni, wathi akukhangela, wabona ingubo yelinen iyodwa, waza wagoduka emangalisiwe koko kwenzekileyo.]

₁₃Kwangaloo mini kwasuka abafundi ababini baya e-Emawusi, idolophana emalunga neekhilomitha ezilishumi elinambini ukusuka eJerusalem. ₁₄Babethetha ngako konke okwakuthe kwenzeka. ₁₅Kwathi besathetha bebuzana, uYesu ngenkqu wasondela wahamba nabo, ₁₆kodwa bembona nje, kwasitheliswa kubo ukuba bamnakane. ₁₇UYesu ke wathi kubo: “Zizinto zini na ezi nihamba nincokola ngazo?”

Bema ke bematshekile; ₁₈waza waphendula omnye, lo ugama linguKleyopa, wathi kuye: “Nguwe kuphela na kwababekho eJerusalem ongazaziyo izinto ezenzeke khona kwezi ntsuku?”

₁₉Wathi kubo: “Zinto zini na?”

Bathi bona kuye: “Ezo zingoYesu waseNazarete, *owayengumshumayeli onamandla amakhulu ekwenzeni imiqondiso nasekuthetheni, engqinelwa nguThixo nangabo bonke abantu. ₂₀Ababingeleli abaziintloko nabaphathi bethu bamnikela ukuba agwetyelwe ukufa, waza wabethelelwa emnqamlezweni. ₂₁Ke thina besithembe ukuba nguye owokhulula uSirayeli. Kunjalo nje namhlanje lusuku lwesithathu zenzekile ezo zinto. ₂₂Kanti abafazi abathile beqela lethu, abathe baya engcwabeni kwakusasa, basothusile, ₂₃kuba bengawufumani umzimba wakhe, babuye besithi babone umbono wezithunywa ezithi uyaphila. ₂₄Basuka nabanye bethu, baya engcwabeni, bafika kunjengoko babetshilo abafazi. Ke yena abambonanga.”

₂₅Waza uYesu wathi kubo: “Ninje na kanti ukungaqondi! Nithatha kade kangaka na ukukholwa kuko konke abâkuthetháyo *abashumayeli! ₂₆*UKrestu ebengamelwe na kukuthi abuve obu bunzima, aze anyuselwe ewongeni?” ₂₇Wabachazela kuzo zonke *iziBhalo iindawo ezithetha ngaye, eqalela kwiincwadi zikaMosis, waya kutsho kuzo zonke ezabashumayeli bamandulo.

₂₈Basondela ke kuloo dolophana babesiya kuyo, wanga uYesu uyagqitha; ₂₉baza bona bamcela besithi: “Hlala nathi, kuba kuyahlwa, nemini seyimkile.” Wangena ke ukuba ahlale nabo. ₃₀Wathi, esetafileni kunye nabo, wathatha isonka, wabulela, wasiqhekeza, wabanika. ₃₁Aqabuka amehlo abo, bamazi. Wathi shwaka yena kubo. ₃₂Baza bathi omnye komnye: “Iintliziyo zethu bezingavuthi na luvuyo xa ebethetha nathi endleleni esityhilela iziBhalo?”

₃₃Besuka kwangelo lixa, babuyela eJerusalem, babafumana abafundi abalishumi elinanye behlanganisene ndawonye kunye nâbo babenabo, ₃₄besithi: “Inene, iNkosi ivukile! Ibonakele kuSimon.” ₃₅Bakubalisa ke okwenzeke endleleni, nokutyhileka kweNkosi kubo xa yayiqhekeza isonka.

₃₆Ke kaloku, besazithetha ezi zinto, uYesu ngenkqu wema phakathi kwabo, [wathi kubo: “Uxolo malube nani.”]

₃₇Basuka bankwantya, baba babona into engengomntu ncam. ₃₈Wathi kubo: “Yini na ukuba nothuke? Kutheni na ukuba nibe nentandabuzo? ₃₉Khangelani izandla zam, niqonde ukuba ndim kanye. Ndiphatheni niqondisise ukuba ndingumntu, ndinenyama namathambo, njengoko nindibona ndinjalo.” [ ₄₀Etshilo wababonisa izandla neenyawo zakhe.]

₄₁Ke kaloku, bâthi bengekakholwa, bemangalisiwe bevuya, wathi kubo: “Ninanto ityiwayo na apha?” ₄₂Bamnika intwana yentlanzi eyojiweyo, ₄₃wayithatha, wayitya bejongile.

₄₄UYesu ke wathi kubo: “Zizo ezi izinto endazithethayo kuni ndisenani, ndisithi zimelwe kukuzaliseka zonke izinto ezibhaliweyo ngam *emthethweni kaMosis, nasezincwadini *zabashumayeli, nasezindumisweni.”

₄₅Waza ke wazikhanyisela iingqondo zabo, ukuze baziqonde *iziBhalo; ₄₆wathi kubo: “Kubhalwe kwathiwa *uKrestu umelwe kukuthi eve ubunzima, abuye avuke kwabafileyo ngomhla wesithathu. ₄₇Kukwabhalwe kusithiwa zothi egameni lakhe zivakaliswe kuzo zonke iintlanga iindaba zenguquko noxolelo lwezono, kuqalelwa eJerusalem. ₄₈Nina ke ningamangqina ezi zinto. ₄₉Niyabona, mna ndilinika nina idinga likaBawo. Ze nihlale ke eJerusalem nide nixhotyiswe ngamandla avela phezulu.”

₅₀UYesu ke waphuma nabafundi bakhe, wabasa ngaseBhetani; waza waphakamisa izandla zakhe, wabasikelela. ₅₁Kwathi esabasikelela, wahlukana nabo, [wanyuswa wasiwa ezulwini]. ₅₂Ke bona [bakuba bequbudile,] babuyela eJerusalem benovuyo olukhulu; ₅₃baza basoloko bekho *endlwini kaThixo, bembonga uThixo.