UJONA 2

“Ekubandezelekeni kwam ndakhala kuNdikhoyo,

waza ke yena wandiphendula.

Ndakhala ndisemathunjini engcwaba,

waza ke wena waliva ilizwi lam.

₃Wena wandiphosa enzonzobileni,

phakath' enzulwini yolwandle,

yaza ke imisinga yandigubungela,

amaza akho alatyuza andisibekela.

₄Ndathatha ndibeka ndisithi:

‘Ndigxothiwe phambi kwakho.’

Noko ke ndobuya ndiyikhangele indlu yakho engcwele.

₅Andigubungela phants' andirhaxa amanzi,

ndathi zwabhabha enzonzobileni.

Izityalo zolwandle zayithandela intloko yam.

₆Ndatshona ndehla mpela,

ndee xhaxhe ngeengcambu zeentaba.

Ndafika nakwelo lizwe

elivalwe mfamlibe ngemivalo.

Ke wena, Ndikhoyo Thixo wam,

wandibuyisa ndiphilile kwelo ngcwaba.

₇“Ndithe ndakubona ukuba ubomi bam buyacutheka,

suka ndakukhumbula wena, Ndikhoyo,

umthandazo wam wanyukela kuwe,

waya kutsho endlwini yakho engcwele.

₈Kambe ke, abazilibazisa ngezithixo ezingento yanto,

balahlekana nenceba yakho.

₉Ke mna ndonikela kuwe ngedini,

ndihlabele iculo lokukudumisa.

Ndosifezekisa isibhambathiso sam.

Usindiso lukuNdikhoyo.”