UYOBI 36

₂“Kambe ke khawundinyamezele kancinci,

kuba kusekho ekufuneka ndikuthethe ndimele uThixo.

₃Olwam ulwazi luvela kude;

lucacisa ukuba uThixo, uMdali wam, lilungisa.

₄Kaloku akukho buxoki kula mazwi am –

ophakathi kwenu unolwazi olugqibeleleyo.

₅UThixo womelele, kodwa akadeleli mntu;

unamandla, nolwazi lwakhe alugungqi.

₆Izikhohlakali akaziyeki zidle ubomi,

kodwa uyabazelelela abo bahlelelekileyo.

₇Akawasusi amehlo akhe kumalungisa.

Nguye obeka ookumkani ezihlalweni,

abanye abayeke apho ixesha elide.

Kodwa ukuba bayaziphakamisa

₈bakhonkxwa ngamatyathanga,

bebanjiwe ngezintya zeentlupheko.

₉UThixo ubatyhilela izenzo zabo,

esalatha izikreqo zabo xa babeziphakamisa.

₁₀Kaloku yena ubenza balulamele ululeko;

ubayalela ukuba bahlukane nobugwenxa.

₁₁Ukuba ke bayamva bemthobela uThixo,

boyigqiba imihla yabo bexhamla indyebo,

neminyaka yabo ibe yeyokwaneliseka.

₁₂Kambe ke xa bengeva baya kutshabalala ngekrele,

bafe ngenxa yokuswela kwabo ulwazi.

₁₃“Abantliziyo zingenaThixo bazongezelela ingqumbo yakhe;

abazibiki kuye naxa bekhonkxiwe.

₁₄Bona bafa besebatsha,

bexhwalekile ngamahlazo abahlala kuwo.

₁₅Kambe uThixo uyabafundisa abantu nangehambo-nzima;

ubavula iindlebe ngokusebenzisa nembandezelo.

₁₆“Nawe wakukhupha enkathazweni,

wakutsho waxhamla intlala-kahle,

usitya uhlutha, ungaswele nto.

₁₇Kodwa ngoku isohlwayo esifanele abakhohlakeleyo siphezu kwakho;

ukugwetywa nokohlwaywa kukufikele.

₁₈Lumka ke umsindo wakho ungawenzi umgibe wokubambisa abanye,

ungazimiseli ukusebenzisa ukunyoba okukhulu ukuguqula imeko.

₁₉Ngaba kukubhomboloza kwakho na okunokukunceda?

Hayi bo, yonke imigudu yakho ayingeke incede.

₂₀Sukulangazelela ukuza kobusuku,

xesha elo batshabalala ngalo abantu.

₂₁Lumka ungayi ebubini;

ungazilahleli kubo ngenxa yokubandezeleka.

₂₂Kaloku uThixo yimbalasane ngamandla;

ke kumba wokufundisa uyingcungela.

₂₃UThixo akaxelelwa mntu amakakwenze;

ngubani onokuthi kuye: ‘Wenze okugwenxa’?

₂₄Khumbula uwuphakamise umsebenzi wakhe,

lowo abantu bawubongayo ngeengoma.

₂₅Bonke abantu bayayibona imisebenzi yakhe,

noxa beyibona bekude nje.

₂₆Hayi ukuba mkhulu kukaThixo!

Uyiphakamele ingqiqo yethu;

inani leminyaka yakhe aligocagoceki.

₂₇“Nguye ofunxa amanzi emhlabeni,

awajike awenze amathontsi emvula,

₂₈mvula leyo ina iphuma emafini,

ibe zizandyondyo kumntu wonke.

₂₉Ngubani okuqondayo ukuhamba kwamafu,

nokuzongoma kweendudumo ezulwini phaya?

₃₀Yena utshawuzisa umbane esibhakabhakeni;

nguye ogubungela inzonzobila yolwandle.

₃₁Le yindlela aluxhasa ngayo uluntu,

aluthi jize ngendyikityha yendyebo.

₃₂Ke yona imibane iselulawulweni lwesandla sakhe;

uyayiyalela itsho ichan' ucwethe.

₃₃Kambe ke sona isiphango sixelwa ziindudumo,

nditsho neenkomo ziyakwazi ukuza kwaso.”