UISAYA 9

₂Abantu ababemfamza ebumnyameni

ngoku bakufumene ukukhanya;

kwabo babehamba ebumnyameni

kubo uthe qheke umsobomvu.

₃Wena usandisile isizwe sakho,

usuke waluthi chatha uvuyo lwaso.

Ngoko ke siyachulumacha ngenxa yakho,

de ngathi sinemihlali ngexa lokuvuna,

sengathi sigcotyiswe kukuxhaphaz' amaxhoba.

₄Kaloku wena uyaphule idyokhwe yaso,

ulususile uxanduva nomqobo obusemagxeni.

Leyo ke yingcinezelo yomcinezeli.

Wena ubuthe kwanga kungomhla wamaMidiyan.

₅Zonke izihlangu zomkhosi ogxashizayo,

nazo zonke iimpahla ezidyojwe ligazi,

ziya kutshatyalaliswa ngomlilo.

₆Andithi na kaloku thina sizalelwe umntwana;

kaloku thina silizwe ngonyana.

Nguye ke oya kulawula.

Ke yena wothiywa igama kuthiwe

nguMcebisi omangalisayo,

uThixo oligorha,

uSonini-nanini,

iTshawe loxolo.

₇Yena uya kuba yingangalala,

into embuso uluxolo olungaphele ndawo.

Yena uya kungena ezihlangwini zikaDavide,

umbuso wakhe awumilisele ume ngxishi,

uxhathise ngomthetho nangobulungisa,

ukusukela ngoku kude kube nini-nini.

*UNdikhoyo onekhwele,

nditsho uSomandla-onke,

nguye oya kuyenza loo nto!

₈INkosi ithumele udaba kuSirayeli;

ewe, lona luya kuwa phezu koYakobi.

₉Bonke ke abantu baya kuluqonda,

uEfrayim nabemi baseSamariya,

abo baqholosa ngendelelo, besithi:

₁₀“Naxa nje zidilikile izindlu zezitena,

thina siya kwakha ngamatye aseleqingqiwe;

ngenene yona imithombe igawulwe,

kodwa thina sotyala imisedare.”

₁₁*UNdikhoyo ubayekele ngeentshaba,

nditsho iintshaba zeentshaba zabo;

ewe, usuke wabaxhokonxela iintshaba.

₁₂Ngama-Aram ngasempumalanga,

ibe ngamaFilistiya ngasentshonalanga;

xa zizonke zigragramela uSirayeli.

Naxa kunjalo uNdikhoyo usafuthekile;

nanko elekuza ngaloo ngalo yakhe!

₁₃Kodwa suka abantu abazisola;

hayi, ababuyelanga kumohlwayi,

abazigobanga kuNdikhoyo uSomandla-onke.

₁₄Ngoko ke uNdikhoyo wosuka amohlwaye uSirayeli:

uya kumnquml' intloko, amgumpul' umsila;

uya kuncothul' isundu, asiphul' ingcongolo.

₁₅Intloko ke ngabadala nezihandiba;

wona umsila ngabashumayeli bobuxoki.

₁₆Kaloku aba bantu bayalahlekiswa;

ewe, bona bayaphuphuthekiswa.

₁₇UNdikhoyo ke akasabakhathalele nabafana,

akayi kuthi thiki nangabahlolokazi neenkedama,

kuba bonke zintw' ezingento, bakhohlakele,

imilomo yabo iphuphum' ububi.

Naxa kunjalo uNdikhoyo usafuthekile;

nanko elekuza ngaloo ngalo yakhe!

₁₈Kaloku inkohlakalo yabantu ivutha njengomlilo;

ileny' inkunzane ngokunjalo nobobo,

idangazel' okomlilo wehlathi,

ithunquza okwentshinyela yomsi.

₁₉Ngenxa yomsindo kaNdikhoyo onamandla onke

eli lizwe liza kuvutha,

umlilo udangazeliswe ngabantu,

kungabikho nonak' umntakwabo.

₂₀Bonqwamza ngapha, bangahluthi noko;

banqunqude ngapho, banganeli noko;

ewe, boda batye noogxa babo.

₂₁UManase noEfrayim bosuka bahlaselane,

kananjalo bosuka badibane ngoJuda.

Naxa kunjalo uNdikhoyo usafuthekile;

nanko elekuza ngaloo ngalo yakhe!