UISAYA 42

“Nasi isicaka sam endisixhasayo.

Yena ngumnyulwa wam ondikholisayo;

ndimthe jize ngoMoya wam,

izizwe zonk' uziphakel' ubulungisa.

₂Yena akakhwazi amemeze;

hayi, akadanduluki ezitalatweni.

₃Ingcongolo ecekethekileyo soze ayaphule,

nesibane esilozisayo soze asicime,

koko uphak' ubulungisa ngokunyaniseka.

₄Yena ke soze atyhafe adangale,

de aphak' ubulungisa ehlabathini;

nezizw' ezikude zilindel' umthetho wakhe.”

₅Nalu udaba lukaThixo uNdikhoyo,

umdali owatwabulula amazulu;

nguye owalaneka ihlabathi nako konk' okwalo;

abemi balo wabaphakel' ubomi,

abantu balo wabanik' ukuphefumla:

₆“Mna Ndikhoyo ndikubizile;

ewe, ndingothembekileyo.

Kaloku ndosoloko ndinawe,

ndikulondoloze,

ndikwenze umnqophiso nabantu bam,

ube kukukhanya ezizweni.

₇Wena uza kuvula amehlo eemfama;

nguwe oza kukhulula amabanjwa;

nguwe oza kuvula intolongo emnyama.

₈“Mna *ndinguNdikhoyo – igama lam ncakasana.

Ubungangamsha bam andinikisi ngabo;

udumo lwam aluzuzwa *yimifanekiso enqulwayo.

₉Zinto endazixelayo zenzekile,

futhi nezintsha ngoku ndiyazibhengeza;

ewe, ndizixela zingekathungululi.”

₁₀Ntyilozani niculele *uNdikhoyo ingoma entsha.

Malimdumise limbonge ihlabathi jikelele;

nditsho nani nonke abahamba phezu kolwandle.

Mazingathi cwaka nezilwanyana zolwandle;

nezikud' izizwe mazibonge zibongisele.

₁₁Mayidumise nentlango nezixeko zayo;

nabaseKedare mabadumise uThixo;

nabaseSela mabamemelele ngemincili;

ewe, mabamemeze naphezu kweentaba.

₁₂Nabo bemi kwizizwe ezikude

mabamdumise uNdikhoyo.

₁₃UNdikhoyo yena ufunza njengegorha;

yena selequle wada waligangatha.

Nankw' esitsho ngentlaba-mkhosi,

nto leyo idiza ukutshatshela kwakhe.

₁₄*UNdikhoyo uthethe wathi:

“Kaloku sekumzuzu ndithe cwaka;

suka ndadl' imu ndazibamba.

Ngoku ke okomfazi osikwa yinimba

ndozibhija-bhija ndide ndibhonge.

₁₅Iinduli neentaba ndosuka ndizibhulule,

okwakuyingca nemithi ndikomise.

Imilambo ndoyibharhisa yome khonkqo,

imigxobhozo nezadunge zitshe khothe.

₁₆Iimfama ndozihambisa ngeendlela ezingazaziyo;

ewe, ndozikhokela ngomendo ongaqhelekanga.

Kubo ubumnyama ndobujika bube kukukhanya;

iingxondorha zojika zibe ngamathafa.

Ezo zinto ndiya kuzenza;

futhi ke soze ndizityeshele konke.

₁₇Ke bona abakholosa *ngemifanekiso,

abo bayinqulayo besithi: ‘*Ningoothixo bethu,’

ngenene baya kuphoxeka bahlazeke.”

₁₈*UNdikhoyo uthethe wathi:

“Khaniphulaphule ke, nani zithulu;

khangelani nibone, nani zimfama.

₁₉Kakade ngubani oyimfama kunesicaka sam?

Sithulu saphi esidlula isigidimi sam?

Ngubani oyimfama okwalowo ungowam;

nditsho oyimfama njengesicaka sikaNdikhoyo?

₂₀Ewe, ubonile kambe, Sirayeli;

nto nje ayikuncedanga nto loo nto;

uvile kambe nangeendlebe zakho,

kodwa suka awaphulaphula.”

₂₁UNdikhoyo othembekileyo yena ulangazelel' ukunceda;

imfundiso yakhe uyayiqaqambisa.

₂₂Kambe ke aba bantu zizisulu zokuxhatshazwa;

sebatshixelwa kwamnyama-ndawo,

bade baya kufihlwa ezintolongweni.

Ziindwayi ezingamaxhob' ukuxhatshazwa;

ziintw' ezingenabani wakuzihlangula.

Akakho othi: “Godukani ngoku.”

₂₃Yaz'ba ngubani na ozimiseleyo ukuphulaphula

ukuze aqonde kwixa elizayo?

₂₄Nguban' ophise ngoYakobi kubaphangi,

onikele ngoSirayeli kubaxhaphazi?

IkwanguNdikhoyo lo sikreqe kuye,

sisuke asahamba ngendlela yakhe,

suka asaphulaphula simthobele.

₂₅Suka ke wavulela umsindo wakhe,

ukuze thina sidad' emfazweni.

Utsho ngomsind' odangazelayo,

koko uSirayeli tu ukuqonda;

suka wavaleka mpela-mpela,

akahoya nokuhoya.