EYEZIQALO 49

₂“Ndingqongeni nibek' iindlebe, zinto zikaYakobi;

mbekeleni iindlebe uyihlo uSirayeli.

₃“URubhen lizibulo lam;

ndazibon' amandla ngaye;

ubudoda bam ndabuqonda ngaye.

Ngoyena unamandla;

ngoyena unewonga koonyana bam bonke.

₄Kambe ke akasayi kutshatshela.

Yintw' efan' igqabhuke okomsinga wamanzi,

kuba yangena iqadi likayise,

yasixabhel' isilili soyise.

₅“USimon noLevi ngoonyongande kuzalana;

zizibhoja ezixhel' abantu ngezixhobo zazo.

₆Andiwangeni amayelenqe abo;

andinanxaxheba kwigqugula labo.

Kaloku bagwint' abantu ngenxa yephuku;

bangxwelerh' iinkomo ngenxa yemfeketho.

₇Linelishw' iphuku labo, kuba liyankwantyisa;

unelishw' umsindo wabo, kub' ukhohlakele.

Bona ndobabhacisa kulo lonke elakwaYakobi,

babe ziintsalu kwelakwaSirayeli.

₈“UJuda yintw' edunyiswa ngamawayo;

yintw' ezithe xhakamfu ngesixhanti iintshaba zayo,

intw' ekhahlelwayo ngabantakwayo.

₉UJuda ndithi yintw' enga yingonyama,

yintw' echwechwel' ixhoba,

ibuy' ibuthume esikhundleni sayo;

buthuthu izolile, ingabe iphazanyiswe nto.

₁₀NguJuda opheth' umsimbithi wokulawula.

Uya kuhlala elawula njalo,

ade afike umniniwo,

izizwe zikhahlele kuye ngentobeko.

₁₁Sisinhanha esibhuqisa kungekavunwa,

esindyebo ixhanyulwa naziidonki.

Nguhlamba ngewayini,

₁₂intw' emehlo aligazi kukumfimfith' iwayini,

le ntw' imazinyo amhlophe zizapholo.

₁₃“UZebhulon uye kuma phezu kolwandle;

yintw' emanxweme azizikhululo zeenqanawa;

yintw' emhlaba uye kuthi xhaxhe ngeSidon.

₁₄“UIsakare akayidluli nganto imbongolo;

yint' ofik' ilele isoyiswa yimithwalo.

₁₅Kambe ke weva ukuba kumnandi ukubuthuma,

nelizwe liyaphumza.

Yintw' egob' umqolo, ithwalisw' imithwalo,

intw' enyanzelwa okwesicaka emsebenzini.

₁₆“UDan ngomnye wezindlu zikaSirayeli;

nguye umgwebi wabantu bakhe.

₁₇UDan yinyoka esecaleni lendlela;

yinyoka enobuhlungu elalel' ukuluma ihashe esithendeni,

khon' ukuze umkhweli limphose phantsi.

₁₈“*Ndikhoyo, ndilindele ukukhululwa nguwe!

₁₉“UGadi yena uya kuhlaselwa liqela lezihange,

kodwa wojika aziswantsulise.

₂₀“Umhlaba ka-Ashere uya kuchuma,

uvelise ukutya okulungele nkqu neekumkani.

₂₁“UNafetali yena lixhama lasendle;

intw' ezala amaduna namathokazi.

₂₂“UJosefu ngumdiliya omi ngasemthonjeni;

intw' emaseb' afukufuku, aqabel' ezindongeni.

₂₃Yintw' ehlaselwa ziintshaba zayo,

ziyisukele ngeentolo nezaphetha.

₂₄Kodwa olwakhe utolo alugungqi,

neengalo zakhe zomelezwa ngamandla oThixo kaYakobi,

yena malusi nomkhuseli kaSirayeli.

₂₅NguThixo kayihlo okuncedayo;

nguThixo uSomandla okuthamsanqelisayo ngeemvula zaphezulu,

nangamanzi aphuma enzulwini ngaphantsi komhlaba.

Nguye okuthamsanqelisa ngabantwana nangemfuyo.

₂₆Amathamsanqa owanikwe nguyihlo

aya kuqina kuneentaba ezisisimakade,

achume kunendyebo yeenduli zaphakade.

Konke oku makuwe phezu kwentloko kaYosefu,

yena ukhethiweyo kubantakwabo.

₂₇“UBhenjamin lithole lengcuka elinoburhalarhume.

Kusasa uqwenga ixhoba;

ngokuhlwa waba okuphangiweyo.”