2 KASAMWELI 22

NguNdikhoyo iliwa lam;

nguye inqaba yam;

nguye umkhuseli wam.

₃Xa ndizimele ngoThixo wam ndihlala ndikhuselekile.

Nguye ikhaka lam;

nguye ondigcina ndifihlakele.

Nguye inqaba yam ephakamileyo;

nguye isikhundla sam sokuzimela.

Mhlanguli wam, nguwe ondisindisayo kumadoda anogonyamelo.

₄Ndithi ndakukhala kuNdikhoyo,

asuke andithi hlasi kwiintshaba zam.

Ngenene, makabongwe uNdikhoyo!

₅Bendintlithwa ngamaza abulalayo,

amaza arhaxayo endigubungele.

₆Ukufa bekundirhangqile,

ingcwaba selivuleke lithe ng'aa.

₇Ndazibika kuNdikhoyo ndikuloo ngxingongo;

ewe, ndabiza kuThixo wam.

Wandiva engqendeve kwibhotwe lakhe,

savakala kuye isikhalo sam.

₈Suka wagungqa wanyikima umhlaba,

isibhakabhaka sangcangcazela,

kuba uThixo wayenomsindo.

₉Kwathi phoko umsi emathatheni akhe,

walephuza amadangatye ngomlomo,

kuliqika amalahle avuthayo.

₁₀Wasikrazula isibhakabhaka

wehla engqendeve phezu kwelifu elimnyama.

₁₁Wandanda ngenqwelo *yezithunyw' ezimaphiko,

itshebeleza ngesantya emoyeni.

₁₂Wayethiwe gqume sisithokothoko,

kumnyama thsu;

engqingwe ziingqimba zamafu anemvula,

₁₃kutshawuza imibane ngaphambi kwakhe,

kunga kuvutha amalahle.

₁₄Wazongoma esibhakabhakeni uNdikhoyo,

lavakala ilizwi loPhezukonke.

₁₅Wadubula ngeentolo zakhe,

zee qhu saa iintshaba,

eziswantsulisa ngokugqekreza kwemibane.

₁₆Watsho zoma qoko iilwandle,

kwatsho kwavela nezisekelo zelizwe,

akukhalima yena uNdikhoyo,

egragramela iintshaba enomsindo.

₁₇Wehla, wandithi hlasi uNdikhoyo,

wandihlangula kumanzi enzonzobila.

₁₈Wandihlangula kwiintshaba zam

nakwabo bandichasayo, bendivuyelela.

₁₉Bandihlasela ndisengxingweni,

wandikhusela yena uNdikhoyo.

₂₀Wandihlangula ndisengozini,

wandisindisa kuba ekholisekile ndim.

₂₁Wandivuza uNdikhoyo kuba ndandilungisa;

wandithamsanqela kuba ndimsulwa.

₂₂Umthetho kaNdikhoyo ndiyawuthobela;

andimfulathelanga uThixo wam.

₂₃Yonke imiyalelo yakhe ndiyigcinile;

andayaphula imithetho yakhe.

₂₄Uyandazi ukuba andonanga;

ndiyazilumla ekwenzeni ububi.

₂₅Ngoko ke uyandivuza kuba ndisenza okulungileyo;

uyandivuza kuba akukho sikhwa kum.

₂₆Uthembekile, Ndikhoyo, kwabo bathembekileyo;

ubenzela ububele abo bandlela zithe tse.

₂₇Umsulwa kwabo bamsulwa;

uchasene nabo bangamatshijolo.

₂₈Ungumsindisi wabathobekileyo,

obabone benekratshi ubathobe.

₂₉Usisibane sokundikhanyisela, wena Ndikhoyo;

nguwe ondigxothela ubumnyama.

₃₀Ewe, ngawe ndingawuchitha-chitha nomkhosi,

ngamandla akho ndilutsibe nongqameko lwawo.

₃₁Hayi bo, zigqibelele izinto azenzayo lo Thixo!

Hayi ukuthembeka kwelizwi lakhe!

Uyabakhusela bonke abo bathembela ngaye.

₃₂NguNdikhoyo yedwa uThixo;

nguye kuphela osikhuselayo;

₃₃ewe, nguThixo oyinqaba yam;

nguye oyenza iphumelele indlela yam.

₃₄Undicondobisa kuhle njengenxala,

andichankcathise emaweni ndingatyibiliki.

₃₅Undiqhelisa ukulwa edabini,

andifundise ukugoba isaphetha esomeleleyo.

₃₆Ndikhoyo, undinike ikhaka lokuhlanganisa;

undibonelele ndatsho ndazimaseka.

₃₇Undimise endaweni ephangaleleyo;

azinakutyibilika kuyo iinyawo zam.

₃₈Ndizisukela ndizoyise iintshaba zam;

andijiki ndide ndizitshabalalise.

₃₉Ndizithi ntshinte-ntshinte zingavuki tu,

ziqungquluze apha phambi kwam.

₄₀Undinika amandla edabini,

undoyisele iintshaba zam.

₄₁Ziyandoyika iintshaba zam;

abandithiyileyo ndibatshabalalisile.

₄₂Ziba ngafuna uncedo zingancedwa bani;

ziba ngazibika kuNdikhoyo angaphenduli.

₄₃Mna ndizicumza zibe njengothuli,

ndizinyhashe okodaka endleleni.

₄₄Wena wandihlangula ekuvukelweni ngamawethu,

walimisa igunya lam elizweni,

ndada ndaphatha nabo bendingabazi.

₄₅Ndikhahlelwa nangabasemzini abantu;

bayandithobela bakuwuva umthetho wam.

₄₆Baphuma kwiinqaba zabo begubha,

bephelelwe sisibindi xa bebonke.

₄₇Huntshuu! Khul' ud' ukhokhobe, Ndikhoyo!

Mawubongwe wena mkhuseli wam,

Thixo ongumhlanguli wam!

₄₈Wena undoyisela iintshaba zam;

wena ugoba iintlanga zindikhahlele;

₄₉wena undihlangula kwabandichasayo!

Ewe, undoyisele iintshaba zam,

wandikhusela kubaphalazi-gazi.

₅₀Ngoko ke ndiya kukubonga phakathi kwezizwe,

ndityibele ndivuma umbongo wakho, Ndikhoyo.

₅₁NguThixo omnika uloyiso ukumkani,

amenzele izibele umthanjiswa wakhe,

uDavide nayo yonke inzala yakhe kude kuse ephakadeni.