UZEKARIYA 6

₁Ndabuya ndawaphakamisa amehlo am, ndakhangela, nanzo iinqwelo zokulwa ziné, ziphuma phakathi kweentaba zombini; iintaba ke iziintaba zobhedu. ₂Enqwelweni yokuqala ibingamahashe abomvu; enqwelweni yesibini ibingamahashe amnyama; ₃enqwelweni yesithathu ibingamahashe amhlophe; enqwelweni yesiné ibingamahashe aziingwevu ezibomvu.

₄Ndaphendula ndathi kwisithunywa esibe sithetha nam, Ziyintoni na ezi zinto, nkosi yam? ₅Saphendula ke isithunywa, sathi kum, Le yimimoya eminé esezulwini, ephuma yakuba ibizimisile ngakwiNkosi yehlabathi lonke. ₆Le inamahashe amnyama iphuma isiya ezweni langasentla; amhlophe aphumé elandela wona; aziingwevu ezibomvu aphumé esiya ezweni langasezantsi; ₇abomvu àphuma, efuna ukulihambahamba ihlabathi. Sathi, Hambani, nilihambahambe ihlabathi. Alihambahamba ke ihlabathi. ₈Sadanduluka kum, sathetha kum, sathi, Yabona, la aphuma aya ezweni langasentla, awuzolise umoya wam ezweni langasentla.

₉Kwafika ilizwi likaYehova kum, lisithi, ₁₀Thabatha kwabasekuthinjweni, abazé khona bevela eBhabheli, kooHeledayi, nakooTobhiya, nakooYedaya, uye wena ngaloo mini endlwini kaYosiya unyana kaZefaniya; ₁₁uthabathe isilivere negolide, wenze izithsaba, ubeke entloko kuYoshuwa unyana kaYotsadaki, umbingeleli omkhulu. ₁₂Uze uthethe kuye uthi, Utsho uYehova wemikhosi ukuthi, Nantso indoda enguHlumelo, igama layo; iya kuhluma endaweni yayo, iyakhe itempile kaYehova. ₁₃Iya kuyakha ke yona itempile kaYehova, ithweswe uzuko, ihlale ilawule etroneni yayo, ibe ngumbingeleli etroneni yayo, icebo loxolo libe phakathi kwabo bobabini. ₁₄Izithsaba zoba kooHelem, nakooTobhiya, nakooYedaya, zibe sisikhumbuzo sobubele bonyana kaZefaniya, etempileni kaYehova. ₁₅Baya kuza abakude bakhe etempileni kaYehova; názi ukuba uYehova wemikhosi undithumele kuni; kuya kwenzeka ke, ukuba nithe naliphulaphula ngenyameko ilizwi likaYehova uThixo wenu.