INGOMA YAZO IINGOMA 4

₁Yabona, ùyinzwakazi, wethu; yabona, ùyinzwakazi.

Amehlo akho anjengawamavukuthu ngaphaya kwesigqubuthelo sakho;

Iinwele zakho zinjengomhlambi weebhokhwe

Osemathambekeni eentaba zaseGiliyadi.

₂Amazinyo akho anjengomhlambi weegusha ezichetyiweyo,

Ezinyukayo zivela ekuhlanjweni,

Zinamawele zonke,

Kungekho ifelweyo kuzo.

₃Ùnjengosinga olubomvu umlomo wakho;

Ukuthetha kwakho kumnandi.

Zinjengothanda lwerharnate iintlafuno zakho

Ngaphaya kwesigqubuthelo sakho.

₄Intamo yakho injengenqaba kaDavide, eyakhiwe ngokweendidi,

Ekuxhonywe kuyo iwaka leengweletshetshe,

Onke amakhaka amagorha.

₅Amabele akho omabini anjengamankonyana amabini angamawele ebhadi,

Esidla phakathi kweenyibiba.

₆Ide iphole imini, oluke amathunzi,

Ndiya kuhamba ndiye entabeni yemore,•

Nasendulini yentlaka emhlophe.

₇Ùyinzwakazi kwaphela, wethu;

Akukho siphako kuwe.

₈Yiza sihle eLebhanon, mtshakazi,

Yiza sihle eLebhanon;

Ufike ubonisele encotsheni yeAmana,

Encotsheni yeSenire neHermon,

Ezikhundleni zeengonyama, ezintabeni zezingwe.

₉Uyingxwelerhile intliziyo yam, dade wethu, mtshakazi;

Uyingxwelerhile intliziyo yam ngomjezulo omnye,

Ngamrhukane mnye wesambalo sakho.

₁₀Azi kuhle ukuncokolisa kwakho, dade wethu, mtshakazi!

Azi kumnandi ukuncokolisa kwakho ngaphezu kwewayini,

Nevumba lamafutha akho ngaphezu kobulawu buphelele!

₁₁Umlomo wakho uvuza incindi, mtshakazi;

Bubusi namasi ngaphantsi kolwimi lwakho.

Ivumba leengubo zakho linjengevumba leLebhanon.

₁₂Ngumyezo obiyelweyo udade wethu, umtshakazi;

Ngumgogogo ovaliweyo, liliso lomthombo elitywiniweyo.

₁₃Amahlumelo akho ngumyezo wemirharnate, kunye neziqhamo ezimnandi kakhulu,

Ikofere• kunye nenadusi;•

₁₄Inadusi nesafron,•

Ikalamo• nesinamon,• kunye nemithi yonke yentlaka emhlophe,

Imore nehaloti,• kunye nobulawu bonke obuyintloko.

₁₅Ùliliso lomthombo lasemiyezweni,

Iqula lamanzi aphilileyo,

Nemiqukuqela yamanzi yaseLebhanon.

₁₆Vuka, moya wasentla, uze nawe wasezantsi:

Phephezela emyezweni wam, buqukuqele ubulawu bawo.

Mayingene intánda yam emyezweni wayo,

Idle isiqhamo esimnandi kakhulu.