KWABASEROMA 16

₁Ke kaloku ndimyaleza kuni uFibhi, udade wethu, ongumlungiseleli webandla eliseKenkreya; ₂ukuze nimamkele ngokwaseNkosini, ngokufanele abangcwele, nimncede emcimbini asukuba enifunela wona; kuba naye ubengumongi wabaninzi, nowam lo.

₃Bulisani kuPrisila noAkwila, abasebenzisi bam abakuKristu Yesu; ₄bona bathi, ngenxa yobomi bam, bazibeka emgoqweni ezabo iintamo, ekungabuleli mna ndedwa kubo, ekubulela nawo onke amabandla azo iintlanga. ₅Bulisani nakwibandla elisendlwini yabo. Bulisani kuPeneto intánda yam, oyintlahlela yelaseAkaya kuKristu. ₆Bulisani kuMariya, yena wabulalekayo kakhulu ngenxa yenu.

₇Bulisani kuAndroniko noYuniya, imizalwane yam nabathinjwa ndawonye nam, bona badumileyo phakathi kwabapostile,• kanjalo baba kuKristu ngaphambi kwam. ₈Bulisani kuAmpliya, intánda yam ngokwaseNkosini. ₉Bulisani ku-Urbhano, umncedisi wethu kuKristu, noStaki intánda yam. ₁₀Bulisani kuApele ocikidekileyo kuKristu. Bulisani kwabakwa-Aristobhulo. ₁₁Bulisani kuHerodiyo, umzalwane wam. Bulisani kwabakwaNarkiso abaseNkosini. ₁₂Bulisani kuTrifena noTrifosa, abo babulalekàyo emsebenzini weNkosi. Bulisani kuPersi, intánda, yena wabulalekayo kakhulu emsebenzini weNkosi. ₁₃Bulisani kuRufo onyuliweyo waseNkosini, nonina, uma. ₁₄Bulisani kuAsinkrito, kuFilego, kuHerme, kuPatrobha, kuHerma, nabazalwana abanabo. ₁₅Bulisani kuFilologo, noYuliya, kuNere, nodade wabo, no-Olimpa, nabo bonke abo bangcwele banabo. ₁₆Bulisanani ngolwango olungcwele. Ayanibulisa amabandla kaKristu.

₁₇Ke kaloku ndiyaniyala, bazalwana, balumkeleni abo benza iimbambaniso nezikhubekiso, ezinxamnye nemfundiso enayifundayo nina, niphambuke kubo. ₁₈Kuba ábanjalo àbakhonzi yona iNkosi yethu uKristu, bakhonza esabo isisu; baze, ngamazwi anencasa nalalanisayo, balukuhle iintliziyo zabangazani nabubi. ₁₉Kuba ukululama kwenu kuye kwafika kubo bonke. Ndiyavuya ngoko ngani; ndinga ke ningaba ngabalumkileyo okunene kokulungileyo; kodwa nibe ngabangenabuqhinga kokubi. ₂₀UThixo ke woxolo uya kumtyumza uSathana kamsinya phantsi kweenyawo zenu.

Ubabalo lweNkosi yethu uYesu Kristu malube nani.

₂₁Bayanibulisa ooTimoti, osebenza nam, noLukiyo, noYason, noSosipatro, imizalwane yam. ₂₂Ndiyanibulisa ngokwaseNkosini, mna Tertiyo, uyibhalileyo le ncwadi. ₂₃Uyanibulisa uGayo, esilundwendwe lwakhe, mna nebandla liphela. Uyanibulisa uErasto, igosa lomzi, noKwarto umzalwana.

₂₄Ubabalo lweNkosi yethu uYesu Kristu malube nani nonke. Amen.

₂₅Ke kaloku, kuye onako ukunizimasa ngokweendaba zam ezilungileyo, novakaliso lukaYesu Kristu, ngokokutyhilwa kwemfihlelo ebifihliwe kwasephakadeni, ₂₆ebonakalalisiweyo ke ngoku, eyaziswayo kanjalo ngezibhalo zabaprofeti ngokommiselo kaThixo ongunaphakade, ukuba kubekho ukulululamela ukholo, kuzo zonke iintlanga: ₂₇kuThixo olumke yedwa, ngaye uYesu Kristu, malubekho uzuko kude kube ngunaphakade. Amen.