IINDUMISO 91

₁Ohleli esitheni lOsenyangweni,

Azilalise emthunzini kaSomandla,

₂Úthi keYehova, Hlathi lam, Mboniselo yam,

Thixo wam, endikholose ngaye!

₃Ngokuba ngokwakhe uya kukuhlangula emgibeni womthiyeli,

Endyikityeni yokufa eyeyelisayo.

₄Wókugubungela ngeentsiba zakhe,

Ùzimele phantsi kwamaphiko akhe.

Likhaka, yingweletshetshe inyaniso yakhe.

₅Akuyi koyikiswa zizothuso ebusuku,

Nalutolo lubaleka emini;

₆Nandyikitya yakufa ihamba esithokothokweni,

Nasifo sibhubhisayo, sibhuqa emini enkulu.

₇Kungawa iwaka ecaleni kwakho,

Isigidi ngasekunene kwakho,

Kodwa kungasondeli nto kuwe.

₈Wòkhangela ngamehlo akho odwa,

Ukubonele ukubuyekezwa kwabangendawo.

₉Ngokuba nguwe, Yehova, ihlathi lam.

Ùmenze Osenyangweni ikhaya lakho.

₁₀Akuyi kuqubisana bubi nawe.

Kungafiki sibetho ententeni yakho.

₁₁Ngokuba izithunywa zakhe úziwisele umthetho ngawe,

Ukuba zikugcine ezindleleni zakho zonke.

₁₂Zokuthwala wena ngezandla zozibini,

Hleze ubetheke ngonyawo lwakho etyeni.

₁₃Wònyathela phezu kwengonyama nephimpi,

Uyinyashe ingonyama entsha nenamba ngeenyawo.

₁₄Ngokuba enamathele kum, ndomsiza;

Ndimse engxondeni, ngokuba elazi igama lam.

₁₅Wóndibiza, ndiphendule,

Ndoba naye embandezelweni;

Ndomhlangula, ndimzukise;

₁₆Ndimanelise ngemihla emide,

Ndimbonise ukusindisa kwam.