IINDUMISO 86

₁Thoba indlebe yakho, Yehova, ndíphendule,

Ngokuba ndilusizana, ndilihlwempu.

₂Wugcine umphefumlo wam, ngokuba ndingowenceba;

Msindise, wena Thixo wam, umkhonzi wakho,

Lo ukholose ngawe.

₃Ndíbabale, Nkosi yam,

Ngokuba ndidanduluka kuwe yonke imini.

₄Wuvuyise umphefumlo womkhonzi wakho,

Ngokuba umphefumlo wam ndiwuphakamisela kuwe, Nkosi yam;

₅Ngokuba ùlungile wena, Nkosi yam, uxolela;

Umkhulu ngenceba kubo bonke abakunqulayo.

₆Wubekele indlebe umthandazo wam, Yehova,

Ulibazele indlebe izwi lokutarhuzisa kwam.

₇Ngemini yokubandezelwa kwam ndinqula wena,

Ngokuba uya kundiphendula.

₈Akukho únjengawe, Nkosi yam, phakathi koothixo;

Akukho zenzo zinjengezakho.

₉Zonke iintlanga owazenzayo ziya kuza ziqubude phambi kwakho, Nkosi yam,

Zizukise igama lakho.

₁₀Ngokuba ùmkhulu, wenza imisebenzi ebalulekileyo,

ÙnguThixo wena wedwa.

₁₁Ndíyalele, Yehova, indlela yakho,

Ndihambe ngenyaniso yakho;

Yibandakanye intliziyo yam ukuba ndiloyike igama lakho.

₁₂Ndiya kubulela kuwe, Nkosi yam, Thixo wam, ngentliziyo yonke,

Ndilizukise igama lakho ngonaphakade:

₁₃Ngokuba inceba yakho ibe inkulu kum;

Wawuhlangula umphefumlo wam kwelingaphantsi labafileyo.

₁₄Thixo, ábakhukhumali basukéle phezulu kum;

Ibandla labanobungqwangangqwili lifuna umphefumlo wam;

Àbakumisi wena phambi kwabo.

₁₅Ke wena, Nkosi yam, unguThixo onemfesane, onobabalo,

Ozeka kade umsindo, omkhulu ngenceba nenyaniso.

₁₆Ndíbheke, undibabale;

Mphe amandla akho umkhonzi wakho,

Úmsindise unyana womkhonzazana wakho.

₁₇Ndénzele umqondiso wokulungileyo,

Bawubone abandithiyayo, badane,

Kuba wena, Yehova, undincedile, wandithuthuzela.