IINDUMISO 84

₁Hayi, ukuthandeka kweminquba yakho, Yehova wemikhosi!

₂Umphefumlo wam ulangazelela, uyaphela kukuzilangazelela, iintendelezo zikaYehova;

Intliziyo yam nenyama yam imemelela kuThixo ophilileyo.

₃Intákana le ifumene ikhaya;

Inkonjane izifumanele indlu,

Apho izalela khona amathole ayo:

Izibingelelo zakho, Yehova wemikhosi,

Kumkani wam, Thixo wam.

₄Hayi, uyolo lwabahlala endlwini yakho!

Basaya kukudumisa. (Phakamisani.)

₅Hayi, uyolo lwabantu abamandla akuwe,

Abakhumbula umendo oya eZiyon!

₆Bephumela entilini yemithi yeBhaka,

Bayenza ibe nemithombo;

Ewe, imvula iyithi wambu ngentsikelelo.

₇Baya besomelela ngokomelela;

Babonakala phambi koThixo eZiyon, bathi,

₈Yehova, Thixo wemikhosi,

Wuve umthandazo wam,

Wubekele indlebe, Thixo kaYakobi. (Phakamisani.)

₉Khangela, Thixo, ngweletshetshe yethu,

Ubukhangele ubuso bomthanjiswa wakho.

₁₀Ngokuba imini enye ezintendelezweni zakho ilungile kunewaka;

Ndinyulé ukuba semnyango endlwini kaThixo wam,

Kunokuhlala ngaphakathi kweentente zokungendawo.

₁₁Ngokuba úlilanga, úyingweletshetshe uYehova uThixo,

UYehova uyabábala azukise;

Abahamba ngokugqibeleleyo akabavimbi nto ilungileyo.

₁₂Yehova wemikhosi,

Hayi, uyolo lomntu okholose ngawe!