IINDUMISO 77

₁Izwi lam lisingisa kuThixo, ndikhala;

Izwi lam lisingisa kuThixo, ukuba andibekele indlebe.

₂Ngemini yokubandezelwa kwam ndiquqela eNkosini yam;

Isandla sam solukile ebusuku, asaqoba;

Awavuma ukuthuthuzeleka umphefumlo wam.

₃Ndikhumbula uThixo, ndincwine;

Ndithelekelele, utyhafe umoya wam. (Phakamisani.)

₄Ùzibambile iinkophe zamehlo am,

Ndikhandiwe, andaba nakuthetha.

₅Ndicinga ngemihla yamandulo,

Iminyaka yasephakadeni;

₆Ndiya kukhumbula ebusuku ukubetha kwam uhadi;

Ndithetha nentliziyo yam, uphengulula umoya wam.

₇Ndithi, Iya kundihlamba ngonaphakade na iNkosi yam,

Ingabi saphinda iphathe ngetarhu na?

₈Iphelé yaphela na inceba yayo?

Sígqibele na isithembiso sayo kwisizukulwana ngesizukulwana?

₉UThixo ukulibele na ukubabala?

Uyivingcele ngomsindo kusini na imfesane yakhe? (Phakamisani.)

₁₀Ndide ndithi ke, Sisifo sam esi;

Yiminyaka yesandla sokunene sOsenyangweni.

₁₁Ndikhankanya izenzo ezincamisayo zikaYehova;

Ngokuba ndikhumbula imisebenzi yakho ebalulekileyo yamandulo.

₁₂Ndicamanga ngako konke ukusebenza kwakho,

Ndithelekelele ngezenzo zakho zonke ezincamisayo.

₁₃Thixo, isebungcweleni indlela yakho;

Ngubani na onguthixo omkhulu njengoThixo wethu?

₁₄UnguloThixo, wenza ngokubalulekileyo;

Wawazísa amandla akho ezizweni,

₁₅Wabakhulula ngengalo abantu bakho,

Oonyana bakaYakobi noYosefu. (Phakamisani.)

₁₆Akúbona amanzi, Thixo,

Akúbona amanzi, azibhija-bhija,

Ewe, agungqa amanzi enzonzobila;

₁₇Amafu engqingqwa aphalaza amanzi,

Isibhakabhaka savakalisa isandi;

Ewe, iintolo zakho zahamba-hamba.

₁₈Izwi lendudumo yakho laba sesaqhwithini,

Imibane yalikhanyisa elimiweyo,

Lagungqa lanyikima ihlabathi.

₁₉Yaba selwandle indlela yakho,

Nomendo wakho waba semanzini amaninzi;

Àwaziwa umkhondo wakho.

₂₀Wabakhokela njengezimvu abantu bakho,

Ngesandla sooMoses noAron.