IINDUMISO 64

₁Líve, Thixo, izwi lam ekukhalazeni kwam;

Ekunkwantyiseni kotshaba bulondoloze ubomi bam.

₂Ndísithelise egquguleni labanobubi,

Ehlokondibeni labasebenzi bobutshinga;

₃Abalulola njengekrele ulwimi lwabo,

Abaxuna iintolo zabo, amazwi akrakra,

₄Bamtole ogqibeleleyo besentsithelweni;

Bamtola ngesiquphe, bangoyiki.

₅Bazomelezela ilizwi elibi,

Bagqiba kwelokuba bafihle izirhintyelo,

Bathi, Singábonwa ngubani na?

₆Baceba ubugqwetha;

Baligqibile icebo abalicebileyo;

Imbilini yendoda nentliziyo yayo yinzulu.

₇Ke uThixo uyabatola ngotolo;

Amanxeba abo abakho ngesiquphe.

₈Baya kukhutyekiswa, lufikele kwabona ulwimi lwabo;

Bayahlunguzela intloko bonke abababonayo.

₉Basuka boyike bonke abantu,

Bawuxele umsebenzi kaThixo,

Basiqiqe isenzo sakhe.

₁₀Liya kuvuya ilungisa ngoYehova, lizímele ngaye,

Baqhayise bonke abantliziyo zithe tye.