IINDUMISO 55

₁Wubekele indlebe umthandazo wam, Thixo,

Musa ukuzifihla esikhungweni sam.

₂Ndíbazele indlebe undiphendule.

Ndiyaphaphatheka ekucamngceni kwam, ndincwine,

₃Ngenxa yelizwi lotshaba,

Ngenxa yokuxinzelelwa phantsi ngabangendawo;

Ngokuba zindiqengqela ubutshinga,

Ziyandisukela ngomsindo.

₄Intliziyo yam iyazibhija-bhija phakathi kwam;

Izothuso zokufa zindiwele.

₅Ukoyika nokuthuthumela kundingene;

Ndigutyungelwe kukududuzela.

₆Ndathi, Andaba bendinamaphiko njengehobe!

Bendiya kubaleka ndiye ndihlale!

₇Nanko ndibalekela kude,

Ndilalise entlango. (Phakamisani.)

₈Bendiya kukhawuleza, ndisinde

Emoyeni ovuthuzayo naseluqhwitheleni.

₉Tshabalalisa, Nkosi yam, yahlula ulwimi lwazo;

Ngokuba ndiboné ukugonyamela nokubambana phakathi komzi.

₁₀Imini nobusuku bajikeleza ezindongeni zawo;

Ubutshinga nokwaphula kuphakathi kwawo;

₁₁Ukweyelisela kuphakathi kwawo;

Endaweni yembutho yawo akusuki ukuxinezela nokukhohlisa.

₁₂Ngokuba àsilutshaba olu lundingcikivayo;

Bendiya kukuthwala oko.

Àsingondithiyileyo lo uzikhulisayo kum;

Bendiya kusithela kuye.

₁₃Nguwe, mntu ubungumlingane wam,

Ikholwane lam endazana nalo,

₁₄Ebesicweya kamnandi,

Siye endlwini kaThixo silihlokondiba eligcobayo.

₁₅Ukufa makubaqubule,

Mabehle baye kwelabafileyo besaphilile;

Ngokuba ububi busemizini yabo phakathi kwabo.

₁₆Mna ndinqula uThixo;

UYehova uya kundisindisa.

₁₇Ngokuhlwa, nakusasa, nasemini enkulu ndiya kucamngca, ndincwine;

Úya kuliva izwi lam.

₁₈Úwukhulula umphefumlo wam unoxolo, ukuze bangasondeli kum,

Ngokuba baninzi abandichasayo.

₁₉UThixo uya kuva, abaphendule,

Uselokwamandulo ehleli, (Phakamisani.)

Abo bangenanguquko,

Bangamoyikiyo uThixo.

₂₀Babasa isandla abaxolelene nabo;

Bahlambela umnqophiso wabo;

₂₁Ubuthelezi njengamasi umlomo wabo,

Ke yimfazwe intliziyo yabo.

Athambile amazwi abo ngaphezu kweoli,

Kanti aziintlangothi zekrele.

₂₂Umthwalo wakho wulahlele kuYehova; yena wokuzimasa;

Akayi kuliyekela ilungisa lishukunyiswe naphakade.

₂₃Wena ke, Thixo, uya kubahlisela emngxunyeni wesihogo.

Abantu bamagazi nenkohliso abayi kuyiqingathisa imihla yabo;

Ke mna ndikholose ngawe.