IINDUMISO 50

₁UThixo, uThixo uYehova uyathetha;

Uyalibiza ihlabathi, ethabathela ekuphumeni kwelanga esisa ekutshoneni kwalo.

₂EZiyon, ukuphela kweenzwana,

Uyakhazimla uThixo.

₃Uyeza uThixo wethu, akayi kuthi cwaka.

Kudla umlilo phambi kwakhe,

Ngeenxa zonke kuye sisaqhwithi esikhulu.

₄Ubiza izulu phezulu,

Nehlabathi, ukuba agwebe phakathi kwabantu bakhe.

₅Úthi, Bahlanganiseleni kum abam benceba,

Abenzé umnqophiso nam ngombingelelo.

₆Izulu lixela ubulungisa bakhe,

Ngokuba uThixo eza kugweba yena. (Phakamisani.)

₇Yivani, bantu bam, ndithethe;

Sirayeli, ndiqononondìse kuwe;

NdinguThixo, uThixo wakho.

₈Andikohlwayi ngenxa yemibingelelo yakho,

Namadini akho anyukayo aphambi kwam amaxesha onke.

₉Andiyi kuthabatha zinkunzi zankomo endlwini yakho,

Nazinkunzi zabhokhwe esibayeni sakho.

₁₀Ngokuba zezam zonke iinyamakazi zehlathi,

Neenkomo ezisezintabeni eziliwaka.

₁₁Iintaka zonke zasezintabeni ndiyazazi,

Nento edakasa endle inam.

₁₂Ukuba bendilambile, ndibe ndingayi kukuxelela;

Ngokuba lelam elimiweyo nenzaliseko yalo.

₁₃Ndidlè inyama yeenkunzi eziziimbalasane na?

Ndisèle igazi leenkunzi zeebhokhwe na?

₁₄Bingelela kuYehova umbulelo,

Uzizalise kOsenyangweni izibhambathiso zakho;

₁₅Ubìze mna ngemini yembandezelo,

Ndikuhlangule, undizukise.

₁₆Ke kongendawo uthi uThixo,

Ùseké phi na wena ukuxela ummiselo wam,

Uwuphàthe ngomlomo wakho umnqophiso wam,

₁₇Úyithiyile nje intethiso wena,

Uwaphosé nje amazwi am emva kwakho?

₁₈Xa ubona isela, ukholana nalo,

Wabelane nabakrexezi.

₁₉Umlomo wakho ùwuyekela ebubini;

Ulwimi lwakho luthungela inkohliso;

₂₀Ùthi uhlale uthethe ngomzalwana wakho,

Uhlaze umntwana kanyoko.

₂₁Ùzenzile ezo nto, ndathi tu,

Waba ndinjengawe.

Ndiya kukohlwaya ndizicwangcise emehlweni akho.

₂₂Khaniqonde ke oko, nina bamlibalayo uThixo,

Hleze ndiqwenge, kungabikho uhlangulayo.

₂₃Obingelela umbulelo uyandizukisa,

Alungise indlela,

Endombonisa kuyo usindiso lukaThixo.