IINDUMISO 49

₁Yivani oku, nina nonke zizwe;

Bekani indlebe, nina nonke, bemi beli phakade,

₂Nina nyana boluntu, nani nyana bamadoda,

Nina zityebi, nani mahlwempu kunye.

₃Umlomo wam uza kuthetha ubulumko;

Nokucamanga kwentliziyo yam kukuqonda.

₄Ndiya kuyithobela emzekelisweni indlebe yam,

Ndiya kuyivulela ngohadi intsonkotha yam.

₅Ndoyikelani na emihleni yobubi,

Xa ubugwenxa babandibambisayo bundijikelayo?

₆Abo bakholose ngemfuyo yabo,

Baqhayisa ngobuninzi bobutyebi babo.

₇Akukho bani unokukhulula umzalwana;

Akanakumnika uThixo isicamagusho ngaye

₈(Sinqabile isikhululo somphefumlo wabo,

Masincanywe ngonaphakade),

₉Sokuba ahlale esidla ubomi ngamaxesha onke,

Angasiboni isihogo.

₁₀Ngokuba ubona izilumko zibhubha,

Bedaka kunye abanyabileyo nezityhakala,

Bayishiye nabanye imfuyo yabo.

₁₁Imbilini yabo ithi izindlu zabo zingunaphakade.

Iminquba yabo ikwizizukulwana ngezizukulwana;

Bayithiya imihlaba yabo ngamagama abo.

₁₂Ke umntu enobuhandiba akanakuhlala,

Ufana neenkomo ezi zitshabalalayo.

₁₃Yiyo le indlela yabanyabileyo,

Neyâbo babalandelayo, bekholiswa ngumlomo wabo. (Phakamisani.)

₁₄Babuthé ngokweegusha kwelabafileyo;

Ukufa kuyabalúsa;

Abathe tye bayabanyathela kwakusa;

Isithomo sabo abo siyonakala kwelabafileyo, singabi nandawo yakuhlala.

₁₅Kodwa uThixo uya kuwukhulula umphefumlo wam esandleni selabafileyo,

Ngokuba eya kundithabatha. (Phakamisani.)

₁₆Musa ukoyika, yakuba sisityebi indoda,

Bakwànda ubuqaqawuli bendlu yayo:

₁₇Ngokuba ekufeni kwayo ayiyi kuthabatha nento,

Aluyi kuhla emva kwayo uzuko lwayo.

₁₈Nakuba umntu ekudleni kwakhe ubomi ebewusikelela umphefumlo wakhe,

Bekudumisa ngokuzichwayithisa kwakho,

₁₉Úya kuya noko esizukulwaneni sooyise;

Abayi kukubona ukukhanya naphakade.

₂₀Ke umntu onobuhandiba, abe engaqondi,

Ufana neenkomo ezi zitshabalalayo.