IINDUMISO 46

₁UThixo ulihlathi, uligwiba kuthi;

Ezimbandezelweni ufumaneke eluncedo kunene.

₂Ngenxa yoko asoyiki ekuphendukeni kwehlabathi,

Ekudilikeleni kweentaba esazulwini solwandle.

₃Makagqume alephuze amanzi alo,

Iintaba zinyikime ngokukratsha kwalo. (Phakamisani.)

₄Kukho umlambo ozibhaxa zivuyisa umzi kaThixo,

Ingcwele yeminquba yOsenyangweni.

₅UThixo uphakathi kwawo, awushukunyiswa;

UThixo uyawunceda kwasekuzeni kokusa.

₆Ziyaxokozela iintlanga, ziyashukuma izikumkani:

Ukhupha izwi lakhe, linyibilike ihlabathi.

₇UYehova wemikhosi unathi,

Ingxonde yethu nguThixo kaYakobi. (Phakamisani.)

₈Yizani nikhangele imisebenzi kaYehova:

Owenze iziphanziso ehlabathini;

₉Ulophelisa iimfazwe kude kuse eziphelweni zehlabathi;

Waphúla isaphetha, angqumze umkhonto,

Atshise iinqwelo zokulwa ngomlilo.

₁₀Yekani, nazi ukuba ndinguThixo mna.

Ndiya kuphakanyiswa ezintlangeni, ndiya kuphakanyiswa ehlabathini.

₁₁UYehova wemikhosi unathi,

Ingxonde yethu nguThixo kaYakobi. (Phakamisani.)