IINDUMISO 39

₁Ndathi, Ndiya kuzigcina iindlela zam,

Ndingoni ngolwimi lwam;

Ndiya kuwugcina ngokuwubopha umlomo wam,

Xa ongendawo asephambi kwam.

₂Ndaba sisidenge, ndathozama,

Ndazisulungisa nakokulungileyo;

Wagxobha-gxobheka umvandedwa wam.

₃Yaba nobushushu intliziyo yam phakathi kwam,

Ekucamangeni kwam wavutha umlilo.

Ndathetha ke ngolwimi lwam,

₄Ndathi, Ndázise, Yehova, isiphelo sam,

Nomlinganiso wemihla yam, into oyiyo;

Mandikwazi ukunqamka kwam, into okuyiyo.

₅Yabona, ùyenzé imihla yam yangangobubanzi besandla;

Nobomi bam bunjengento engento phambi kwakho;

Ngumphunga nje bonke abantu, nakuba bemi. (Phakamisani.)

₆Ùhamba-hamba umntu enjengesithunzi nje kodwa;

Baxokozela ngomphunga nje kodwa;

Bafumba, bengazi ukuba ngubani na oya kukuhlanganisa.

₇Ngoku ndiya kuthembela kwintoni na, Nkosi yam?

Ukulinda kwam kukuwe.

₈Ndihlangule elukreqweni lwam lonke;

Musa ukundimisela ingcikivo yesidenge.

₉Ndisisidenge, umlomo wam andiwuvuli,

Ngokuba oko kwenziwe nguwe.

₁₀Sisuse kum isibetho sakho;

Mna ndiyaphela kukutyundyutha kwesandla sakho.

₁₁Wakumthethisa umntu ngezohlwayo ngenxa yobugwenxa,

Ùyasonakalisa njengenundu isoya sakhe;

Bangumphunga nje kodwa bonke abantu. (Phakamisani.)

₁₂Yiva umthandazo wam, Yehova,

Kubekele indlebe ukuzibika kwam.

Musa ukuthi tu ezinyembezini zam;

Ngokuba ndingumphambukeli kuwe,

Undwendwe, njengoobawo bonke.

₁₃Bheka phaya, ungandikhangeli, khendincumeze,

Ndingekemki ndingabi sabakho.