IINDUMISO 35

₁Bambana, Yehova, nababambana nam.

Yilwa nabalwa nam.

₂Qubula ikhaka nengweletshetshe,

Usuk' ume undincede.

₃Rhola umkhonto, uvingce indlela yabandisukelayo;

Yithi kumphefumlo wam, Ndilusindiso lwakho.

₄Mabadane, bahlazeke, abazungula umphefumlo wam;

Mababuye umva babe neentloni abacinga ububi ngam.

₅Mababe njengomququ phambi komoya,

Sibatyhale isithunywa sikaYehova, bawe.

₆Indlela yabo mayibe mnyama, ibe buthelezi,

Sibasùkele isithunywa sikaYehova.

₇Ngokuba basigqumele mna isibatha sabo ngelizé;

Bawumbela isihogo umphefumlo wam ngelizé.

₈Mayimfikele intshabalalo engazi;

Sibambise yena isibatha sakhe awasigqumayo,

Eyele kuso ngesithonga.

₉Wógcoba ke umphefumlo wam kuYehova,

Ube nemihlali ngosindiso lwakhe.

₁₀Onke amathambo am aya kuthi, Yehova, ngubani na onjengawe,

Mhlanguli wosizana kowomeleleyo kunalo,

Kwausizana nehlwempu kumxhakamfuli walo?

₁₁Kusuke kwema amangqina angenakulungisa,

Andibuza into endingayaziyo.

₁₂Bandibuyekeza ngobubi esikhundleni sokulungileyo;

Uxhwalekile umphefumlo wam.

₁₃Ke mna, xa babesifa, iingubo zam bezizezirhwexayo;

Ndawucinezela umphefumlo wam ngokuzila ukudla;

Umthandazo wam wabuyela esifubeni sam.

₁₄Ndaziphatha njengokungathi únguwethu, njengokungathi úngumzalwana kum, ukuhamba-hamba kwam;

Ndanga ndingombambazelela unina, ukuthobeka kwam, ndinezimnyama zokuzila.

₁₅Ke ekuqhwaleleni kwam avuya, ahlangana,

Ahlangana ngam amagxidolo, nendingabaziyo,

Bandihlalela ngentlamba, àbayeka.

₁₆Ngokweentshembenxa ezizihiba ngenxa yesonka,

Banditshixizela amazinyo.

₁₇Nkosi, kunini na ubonela?

Buyisa umphefumlo wam kwiintshabalaliso zabo,

Okuphela kwawo ezingonyameni.

₁₈Ndiya kubulela kuwe ebandleni elikhulu,

Ebantwini abaninzi ndiya kukudumisa.

₁₉Mazingandivuyeleli iintshaba zam ngobuxoki,

Bangatyandelani ngoshiyi abandithiyayo ngelizé:

₂₀Ngokuba àbathethi luxolo;

Bacinga amazwi enkohliso ngabanyhamnyhekileyo belizwe.

₂₁Bayandisinekela,

Bathi, Tshotsho! Tshotsho! Abonile amehlo ethu.

₂₂Ùbonile, Yehova; musa ukuba sisithulu;

Nkosi, musa ukuba kude kum.

₂₃Zivuse, uphaphe ngenxa yebango lam,

Thixo wam, Nkosi yam, ngenxa yento esibambene ngayo.

₂₄Líthethe ityala lam ngokobulungisa bakho,

Yehova Thixo wam;

Mabangandivuyeleli;

₂₅Mabangàthi entliziyweni yabo,

Tshotsho! Nantso into ebe siyfuna!

Mabangàthi, Simginyile.

₂₆Mabadane, babe neentloni kunye

Abavuyela ububi bam;

Bambathe ukudana nehlazo

Abazikhulisayo kunam.

₂₇Mabamemelele, bavuye, abananzé ubulungisa bam,

Bahlale besithi, Makabe mkhulu uYehova,

Ulonanzé uxolo lomkhonzi wakhe.

₂₈Ulwimi lwam luya kuxela ubulungisa bakho

Nendumiso yakho, imihla yonke.