IINDUMISO 30

₁Ndiya kukuphakamisa, Yehova, kuba undirholile wandinyusa,

Akwazivuyisa iintshaba zam ngam.

₂Yehova, Thixo wam,

Ndazibika kuwe, wandiphilisa;

₃Yehova, uwunyusile kwelabafileyo umphefumlo wam,

Wandidlisa ubomi, ukuba ndingehli ndiye emhadini.

₄Mbetheleni uhadi uYehova, nina bakhe benceba,

Nibulele isikhumbuzo sakhe esingcwele.

₅Ngokuba yinto yephanyazo umsindo wakhe,

Itarhu lakhe liyinto yobomi;

Ngokuhlwa kulalisa ukulila,

Kusasa kubakho ukumemelela.

₆Ke mna ndathi ebunqobeni bam,

Andiyi kushukunyiswa naphakade.

₇Yehova, enkolosekweni yakho ùbuyiqinisile intaba yam;

Ubusithelisile ubuso bakho, ndakhwankqiswa.

₈Ndadanduluka kuwe, Yehova,

Ndakhunga kuYehova:

₉Ndathi, Kukho nzuzo yani na egazini lam, ekuhlèni kwam ndiye esihogweni?

Lokudumisa na uthuli? loyixela na inyaniso yakho?

₁₀Yiva, Yehova, undibabale;

Yehova, yiba ngumncedi wam.

₁₁Wakugúqula ukulila kwam, kwaba kukuqamba;

Wandikhulula ezirhwexayo, wandibhinqisa uvuyo,

₁₂Ukuze uzuko lwam luvume ngawe, lungàthi cwaka.

Yehova, Thixo wam, ndiya kubulela kuwe ngonaphakade.