IINDUMISO 24

₁LelikaYehova ihlabathi nenzaliseko yalo,

Elimiweyo, nabahleli kulo;

₂Ngokuba yena waliseka phezu kweelwandle,

Walizinzisa phezu kwemilambo.

₃Ngubani na onokunyuka aye entabeni kaYehova?

Ngubani na onokuma endaweni yakhe engcwele?

₄Ngozandla zimsulwa, ontliziyo inyulu,

Ongawuphakamiseli kwinkohlakalo umphefumlo wakhe,

Ongafungiyo ngenkohliso.

₅Úya kwamkela intsikelelo kuYehova,

Nobulungisa kuThixo ongumsindisi wakhe.

₆Siso eso isizukulwana sabamngxameleyo,

Sababufunayo ubuso bakho, Thixo kaYakobi. (Phakamisani.)

₇Phakamisani iintloko zenu, masango;

Niziphakamise, minyango yaphakade,

Angene uKumkani wozuko.

₈Ngubani na ke lo Kumkani wozuko?

NguYehova onamandla, oligorha;

NguYehova, igorha emfazweni.

₉Phakamisani iintloko zenu, masango,

Niziphakamise, minyango yaphakade,

Angene lo Kumkani wozuko.

₁₀Ngubani na ke yena uKumkani wozuko?

NguYehova wemikhosi,

Nguye lo Kumkani wozuko. (Phakamisani.)