IINDUMISO 18

₁Ndikuthanda ngembilini yam, Yehova, lomelelo lwam.

₂Yehova, ngxondorha yam, mboniselo yam, msindisi wam,

Thixo wam, liwa lam endizímela ngalo,

Ngweletshetshe yam, luphondo losindiso lwam, ngxonde yam!

₃Ndinqula uYehova ongowokudunyiswa,

Ndiyasindiswa ezintshabeni zam.

₄Izintya zokufa zandijikela;

Imilambo yobutshijolo yandidandathekisa.

₅Izintya zelabafileyo zandibhijela;

Izirhintyelo zokufa zabetha kum.

₆Ekubandezelekeni kwam ndanqula uYehova,

Ndazibika kuThixo wam;

Waliva etempileni yakhe izwi lam,

Ukuzibika kwam kwafika phambi kwakhe ezindlebeni zakhe.

₇Lahexa ke lanyikima ihlabathi,

Iziseko zeentaba zagungqa,

Zahexa, ngokuba enomsindo.

₈Kwathi thaphu umsi emathatheni akhe,

Wadla umlilo, uphuma emlonyeni wakhe,

Kwavutha amalahle ephuma kuwo.

₉Wawathoba amazulu, wehla,

Yangamafu amnyama phantsi kweenyawo zakhe.

₁₀Wakhwela ekerubhini,• waphaphazela,

Wee tshwebelele ngamaphiko omoya.

₁₁Wamisa ubumnyama baba lisithe lakhe, umnquba wakhe ngeenxa zonke kuye;

Ubumnyama bamanzi, iingqimba zamafu.

₁₂Ekukhanyeni okuphambi kwakhe, kwatyhoboza emafini akhe

Isiphango samatye, namalahle omlilo.

₁₃Wadudumisa ezulwini uYehova,

Ophezu konke walikhupha ilizwi lakhe.

Yasisiphango samatye namalahle omlilo.

₁₄Wathuma iintolo zakhe, wabaphangalalisa;

Yamininzi imibane, wabadubaduba.

₁₅Imiphantsi yamanzi yabonakala,

Kwatyhileka iziseko zelimiweyo

Ngokukhalima kwakho, Yehova,

Ngokufutha komoya womsindo wakho.

₁₆Wolula isandla ephezulu, wandibamba,

Wandirhola emanzini amaninzi.

₁₇Wandihlangula elutshabeni lwam olunamandla,

Kwabandithiyileyo, ngokuba bebomelele kunam.

₁₈Bandifikela ngemini yokusindeka kwam,

UYehova wandixhasa.

₁₉Wandikhuphela endaweni ebanzi,

Wandihlangula, ngokuba endithandile.

₂₀UYehova wandiphatha kakuhle ngokobulungisa bam,

Wandibuyisela ngokobunyulu bezandla zam.

₂₁Ngokuba ndizigcina iindlela zikaYehova,

Andemka ngokungendawo kuThixo wam.

₂₂Ngokuba onke amasiko akhe aphambi kwam,

Nemimiselo yakhe andiyisusi kum;

₂₃Ndaye ndingogqibeleleyo kuye,

Ndazigcina, andaba nabugwenxa,

₂₄Wandibuyisela ke uYehova ngokobulungisa bam,

Ngokobunyulu bezandla zam phambi kwamehlo akhe.

₂₅Kowenceba ùzenza owenceba,

Kwigorha eligqibeleleyo uzenza ogqibeleleyo;

₂₆Kozenze nyulu uzenza onyulu,

Kojibilizayo uzenza onobuqhokolo.

₂₇Ngokuba wena uyabasindisa abantu ababandezelekileyo,

Uwathobe amehlo aqwayingileyo.

₂₈Ngokuba ùyasilumeka isibane sam wena;

UYehova uThixo wam uyabukhanyisela ubumnyama bam.

₂₉Ngokuba ngawe ndigila amajarha,

NgoThixo wam ndiqabela ezindongeni.

₃₀UThixo yena, igqibelele indlela yakhe;

Ilizwi likaYehova linyibilikisiwe,

Úyingweletshetshe kubo bonke abazimela ngaye.

₃₁Ngokuba ngubani na onguThixo, ingenguye uYehova?

Ngubani na oliliwa, ingenguThixo wethu?

₃₂UloThixo undibhinqise ubukroti,

Uyigqibelelisileyo indlela yam;

₃₃Uzifanisayo iinyawo zam nezamaxhamakazi,

Undimisayo emimangweni yam;

₃₄Uzifundisayo ukulwa izandla zam,

Zityede isaphetha sobhedu iingalo zam.

₃₅Undinikileyo ingweletshetshe yosindiso lwakho;

Sandixhasa isandla sakho sokunene;

Ululamo lwakho lwandikhulisa.

₃₆Wawenzela indawo ebanzi amanyathela am phantsi kwam,

Amaxhwele am akahexa.

₃₇Ndazisukela iintshaba zam, ndazifumana;

Andabuya zada zaphela.

₃₈Ndaziqoba; azaba nakuvuka,

Zawa phantsi kweenyawo zam.

₃₉Wandibhinqisa ubukroti ekulweni,

Wabaguqisa phantsi kwam abasukela phezulu kum;

₄₀Wandinika ikhosi leentshaba zam,

Abandithiyayo ndababhangisa.

₄₁Bazibika, akwabakho msindisi;

Bazibika kuYehova, akabaphendula.

₄₂Ndabacola, banjengothuli phambi komoya,

Ndabaphalaza njengodaka lwezitrato.

₄₃Wandisiza ekubambaneni kwabantu,

Wandimisa ndayintloko yeentlanga;

Abantu ebe ndingabazi bandikhonza.

₄₄Besave ngeendlebe, bandithobela,

Oonyana bolunye uhlanga bahanahanisa kum;

₄₅Oonyana bolunye uhlanga bantshwenya,

Baphuma bengcangcazela ekuvingcelweni kwabo.

₄₆UYehova uhleli; lelokubongwa iliwa lam,

Aphakanyìswe uThixo ondisindisayo.

₄₇UloThixo wandinika impindezelo,

Uzikhandaniselayo izizwe phantsi kwam;

₄₈Úndisiza ezintshabeni zam;

Ewe, wena undiphakamisayo kwabasukela phezulu kum,

Undihlàngule kumfo ogonyamelayo.

₄₉Ngenxa yoko ndiya kubulela kuwe, Yehova, phakathi kweentlanga,

Ndivume kwigama lakho.

₅₀Ulokhulisa iintsindiso zokumkani wakhe;

Wenzayo inceba kumthanjiswa wakhe,

KuDavide, nakwimbewu yakhe kude kuse ephakadeni.