IINDUMISO 149

₁Haleluya!

Mvumeleni uYehova ingoma entsha,

Indumiso yakhe ebandleni labenceba.

₂USirayeli makavuye ngoMenzi wakhe;

Usapho lwaseZiyon malugcobe ngoKumkani walo.

₃Mabalidumise igama lakhe beqamba,

Bembethela ingqongqo nohadi.

₄Ngokuba uYehova uyakholiswa ngabantu bakhe,

Uyabahombisa abalulamileyo ngoloyiso.

₅Mabadlamke benozuko abenceba,

Mabamemelele besezililini zabo.

₆Yimibongo kaThixo emqaleni wabo,

Likrele elintlangothi mbini esandleni sabo;

₇Ukuze benze impindezelo ezintlangeni,

Izohlwayo ezizweni;

₈Bakhonkxe ookumkani bazo ngemixokelelwane,

Nabazukileyo kuzo ngamakhamandela esinyithi;

₉Benze kubo isiko elibhaliweyo.

Luzuko olo lwabakhe benceba bonke.

Haleluya!