IINDUMISO 148

₁Haleluya!

Dumisani uYehova emazulwini;

Mdumiseni ezindaweni eziphezulu.

₂Mdumiseni, nonke zithunywa zakhe;

Mdumiseni, nonke mikhosi yakhe;

₃Mdumiseni, wena langa, nawe nyanga;

Mdumiseni, nonke zinkwenkwezi zinokukhanya;

₄Mdumiseni, mazulu awo amazulu,

Nani, manzi angaphezu kwezulu.

₅Mazilidumise ezo nto igama likaYehova;

Ngokuba wawisa umthetho, zadalwa.

₆Wazimisa ngonaphakade kanaphakade,

Wazimisela ummiselo ezingayi kuwugqitha.

₇Dumisani uYehova ehlabathini,

Nina bominenga, nani nonke, manzi enzonzobila:

₈Wena mlilo, nawe sichotho; wena khephu, nawe msi;

Moya uvuthuzayo, ulenzayo ilizwi lakhe;

₉Nina zintaba, nani zinduli nonke,

Nina mithi eneziqhamo, nani misedare• nonke;

₁₀Nina marhamncwa, nani zinkomo nonke,

Nina zinambuzane, nani zintaka zinamaphiko;

₁₁Ookumkani behlabathi, nezizwe zonke,

Abathetheli nabagwebi behlabathi lonke;

₁₂Umlisela kwanomthinjana,

Amadoda amakhulu kunye nabafana:

₁₃Mabalidumise igama likaYehova,

Ngokuba liyingxonde igama lakhe yena yedwa;

Indili yakhe ingaphezu komhlaba nezulu.

₁₄Wabaphakamisela abantu bakhe uphondo,

Lwayindumiso kwabakhe benceba bonke,

Koonyana bakaSirayeli, abantu abasondeleyo kuye.

Haleluya!