IINDUMISO 135

₁Dumisani igama likaYehova;

Dumisani, nina bakhonzi bakaYehova,

₂Nimiyo endlwini kaYehova,

Ezintendelezweni zendlu yoThixo wethu.

₃Dumisani uYehova, ngokuba elungile uYehova;

Libetheleni uhadi igama lakhe, ngokuba kumnandi.

₄Ngokuba uYehova unyule uYakobi ukuba abe ngowakhe,

Wanyula uSirayeli ukuba abe yinqobo kuye.

₅Ngokuba ndiyazi mna ukuba mkhulu uYehova,

INkosi yethu ingaphezu koothixo bonke.

₆Konke akuthandileyo uYehova uya kwenza,

Ezulwini nasemhlabeni,

Ezilwandle nasemanzini onke enzonzobila.

₇Ulonyusa amafu eziphelweni zehlabathi,

Imvula wayenzela imibane;

Ulorhola umoya koovimba bakhe.

₈Owawabulalayo amazibulo aseYiputa,

Ethabathele ebantwini wesa ezinkomeni;

₉Wathumela imiqondiso nezimanga

Phakathi kwakho, Yiputa,

KuFaro nakubakhonzi bakhe bonke;

₁₀Owabulala iintlanga ezinkulu,

Wabulala ookumkani abanamandla;

₁₁OoSihon, ukumkani wama-Amori,

No-Ogi, ukumkani waseBhashan,

Nezikumkani zonke zakwaKanan;

₁₂Walinikela ilizwe labo lalilifa,

Lalilifa kumaSirayeli, abantu bakhe,

₁₃Yehova, igama lakho lingunaphakade,

Inkumbuzo yakho, Yehova, ikwizizukulwana ngezizukulwana.

₁₄Ngokuba uYehova uya kugweba phakathi kwabantu bakhe,

Azohlwaye ngenxa yabakhonzi bakhe.

₁₅Izithixo zeentlanga yisilivere negolide,

Umsebenzi wezandla zabantu.

₁₆Zinomlomo nje, azithethi;

Zinamehlo nje, aziboni;

₁₇Zineendlebe nje, aziva;

Akukho nento engumoya emlonyeni wazo.

₁₈Baya kuba njengazo abenzi bazo,

Bonke abasukuba bekholose ngazo.

₁₉Nina ndlu kaSirayeli, bongani uYehova;

Nani ndlu ka-Aron, bongani uYehova.

₂₀Nina ndlu kaLevi, bongani uYehova;

Nani boyika uYehova, bongani uYehova.

₂₁Ngowokubongwa uYehova eZiyon,

Ulohlala eYerusalem.

Haleluya!