IINDUMISO 110

₁Utsho uYehova eNkosini yam ukuthi,

Hlala ngasekunene kwam,

Ndide iintshaba zakho ndizenze

Isitulo seenyawo zakho.

₂Intonga yamandla akho úya kuyithumela uYehova, ivela eZiyon, esithi,

Yiba nobukhosi phakathi kweentshaba zakho.

₃Abantu bakho baya kuzinikela ngeentliziyo, ngemini yakho yokuphuma umkhosi;

Bebethe ezingcwele, ekuphumeni kwesifingo,

Úza kuwe umbethe womlisela wakho.

₄Ufungile uYehova, akayi kuzohlwaya; uthe,

Ùngumbingeleli ngonaphakade wena

Ngokohlobo lukaMelkitsedeke.•

₅INkosi ngasekunene kwakho

Iya kuphalusa ookumkani ngemini yomsindo wayo.

₆Iya kugweba phakathi kweentlanga, kuzale zizidumbu;

Iphaluse intloko ezweni elibanzi.

₇Endleleni iya kusela emlanjaneni;

Ngenxa yoko iya kuphakamisa intloko.