IINDUMISO 108

₁Izimasekile intliziyo yam, Thixo,

Ndiya kuvuma, ndibethe uhadi,

Kwanozuko lwam.

₂Vukani, mrhubhe nohadi;

Ndiya kusiphangela isifingo.

₃Ndiya kubulela kuwe phakathi kwezizwe, Yehova,

Ndikubethele uhadi phakathi kwezizwe.

₄Ngokuba inkulu ngaphezu kwezulu inceba yakho,

Yada yesa esibhakabhakeni inyaniso yakho.

₅Zíphakamise ngaphezu kwezulu, Thixo,

Bube phezu kwehlabathi lonke ubuqaqawuli bakho.

₆Ukuze zihlangulwe iintánda zakho,

Sindisa ngesandla sakho sokunene, undiphendule.

₇UThixo uthethe engcwele; mandivuyelele,

Ndimàbe uShekem, ndiyilinganisele intili yaseSukoti.

₈Ngowam uGiliyadi, ngowam uManase,

UEfrayim sisigcina-ntloko sam,

UYuda yintonga yam yommiselo;

₉UMowabhi sisitya sam sokuhlambela,

Ndiyiphosa kuEdom imbadada yam;

Ndiduma ngelamaFilisti.

₁₀Ngubani na owondisa emzini onqatyisiweyo,

Ngubani na owondikhaphela kwaEdom?

₁₁Asinguwe na, Thixo, lo usihlambileyo?

Akwaphuma, Thixo, nemikhosi yethu.

₁₂Síncede kumbandezeli wethu;

Alunto yanto usindiso lomntu.

₁₃NgoThixo siya kweyisa,

Abagqushe yena ababandezeli bethu.