IINDUMISO 106

₁Haleluya!

Bulelani kuYehova, ngokuba elungile,

Ngokuba ingunaphakade inceba yakhe.

₂Ngubani na onokuzixela izenzo zobugorha bukaYehova,

Onokuyivakalisa yonke indumiso yakhe?

₃Hayi, uyolo lwabaligcinayo isiko,

Lwabenza ubulungisa ngamaxesha onke!

₄Ndíkhumbule, Yehova, ekwenzeni kwakho isisa kubantu bakho;

Ndíyelele ngosindiso lwakho,

₅Ukuze ndibone inyhweba yabanyulwa bakho,

Ndivuye ekuvuyeni kohlanga lwakho,

Ndiqhayise kunye nelifa lakho.

₆Sonile, thina noobawo;

Senzé ubugwenxa, senzé okungendawo.

₇Oobawo abayiqiqanga eYiputa imisebenzi yakho ebalulekileyo;

Ababukhumbulanga ubuninzi beenceba zakho;

Baphika elwandle, eLwandle oluBomvu.•

₈Wábasindisa ngenxa yegama lakhe,

Ukuze abazíse ubugorha bakhe.

₉Walukhalimela uLwandle oluBomvu, loma,

Wabahambisa emanzini anzongonzongo kwanga kusentlango.

₁₀Wabasindisa esandleni sobathiyayo,

Wabakhulula esandleni sotshaba.

₁₁Amanzi abagubungela ababandezeli babo,

Akwasala namnye kubo.

₁₂Bakholwa ke ngamazwi akhe,

Bayivuma indumiso yakhe.

₁₃Kanti bahle bazilibala izenzo zakhe,

Àbalilinda icebo lakhe.

₁₄Bàkhanukile entlango,

Bamlinga uThixo enkangala.

₁₅Wabanika abakubizayo;

Wathumela ukungcumbeka emphefumlweni wabo.

₁₆Bamenzela umona uMoses eminqubeni,

NoAron ongcwele kaYehova.

₁₇Wavuleka umhlaba, wamginya uDatan,

Waliselela ibandla lika-Abhiram;

₁₈Umlilo walitshisa ibandla labo,

Amalangatye abalenya abangendawo.

₁₉Bênza ithole eHorebhe,

Baqubuda emfanekisweni otyhidiweyo.

₂₀Balwananisa uzuko lwabo

Ngento emilise okwenkomo edla utyani.

₂₁Bamlibala uThixo, umsindisi wabo,

Owênza imisebenzi emikhulu eYiputa;

₂₂Imisebenzi ebalulekileyo ezweni lakwaHam,

Imisebenzi eyoyikekayo eLwandle oluBomvu.

₂₃Wathi uya kubatshabalalisa,

Koko wesukayo uMoses, umnyulwa wakhe,

Wema ethubeni phambi kwakhe,

Ebuyisa ubushushu bakhe, ukuba angàtshabalalisi.

₂₄Balicekisa ilizwe elinqwenelekayo,

Àbakholwa lilizwi lakhe,

₂₅Bakrokra ezintenteni zabo,

Àbaliphulaphula izwi likaYehova.

₂₆Wabaphakamisela isandla sakhe,

Wafungela ukuba abawise entlango;

₂₇Ayiwise imbewu yabo phakathi kweentlanga,

Abachithachithe emazweni.

₂₈Bazibandakanya noBhahali-pehore,•

Badla imibingelelo yabafileyo,

₂₉Bamqumbisa ngeentlondi zabo;

Sagaleleka phakathi kwabo isibetho.

₃₀Wesuka wema uPinehasi, walamla;

Sathintelwa isibetho.

₃₁Oko kwabalelwa kuye ekuthini bubulungisa

Izizukulwana ngezizukulwana kude kuse ephakadeni.

₃₂Bamqumbisa emanzini aseMeribha,•

Kwehla ububi kuMoses ngenxa yabo;

₃₃Ngokuba bawuphikisa umoya wakhe,

Waphololoza ke ngomlomo wakhe.

₃₄Àbazitshabalalisa izizwe,

Awayethethé ngazo kubo uYehova;

₃₅Baxubana neentlanga ezo,

Bafunda izenzo zazo;

₃₆Bakhonza izithixo zazo,

Yaba sisirhintyelo kubo.

₃₇Babingelela ngoonyana babo nangeentombi zabo kwiidemon;

₃₈Baphalaza igazi elimsulwa,

Igazi loonyana babo neleentombi zabo,

Ábabingelela ngabo kwizithixo zakwaKanan;

Lahlanjelwa ilizwe ngamagazi.

₃₉Baba ziinqambi ngezenzo zabo,

Bahenyuza ngeentlondi zabo.

₄₀Wavutha ke umsindo kaYehova kubantu bakhe,

Laba lisikizi kuye ilifa lakhe.

₄₁Wabanikela ezandleni zeentlanga,

Balawulwa ngababathiyileyo.

₄₂Zabaxina iintshaba zabo,

Bathotyelwa phantsi kwezandla zazo.

₄₃Zibe zininzi izihlandlo ebahlangula;

Ke bona bamphikisa ngamaqhinga abo,

Bonákala bubugwenxa babo.

₄₄Noko ke wakunonelela ukubandezelwa kwabo,

Akuva ukuhlahlamba kwabo.

₄₅Wawukhumbula ngenxa yabo umnqophiso wakhe,

Wazohlwaya ngenxa yobuninzi beenceba zakhe.

₄₆Wabafumanisa imfesane

Phambi kwabo bonke abaye bebathimbile.

₄₇Sísindise, Yehova, Thixo wethu,

Síbuthe ezintlangeni,

Ukuze sibulele kwigama lakho elingcwele,

Sizingce ngendumiso yakho.

₄₈Makabongwe uYehova, uThixo kaSirayeli,

Kususela kwaphakade kude kuse ephakadeni.

Mabathi bonke abantu, Amen.

Haleluya!