IINDUMISO 104

₁Mbonge uYehova, mphefumlo wam.

Yehova, Thixo wam, umkhulu kakhulu;

Wàmbethe indili nobungangamela.

₂Ulothi wambu ukukhanya njengengubo,

Ulolaneka izulu njengelengalenga lentente;

₃Ulohlanganisa emanzini imiqadi yamagumbi akhe aphezulu;

Ulowenza amafu inqwelo yakhe,

Ulohamba ngamaphiko omoya;

₄Ulowenza izithunywa zakhe imimoya,

Abalungiseleli bakhe umlilo olenyayo.

₅Wáliseka ihlabathi phezu kwemimiso yalo,

Ukuba lingashukunyiswa naphakade kanaphakade.

₆Wáligubungela ngamanzi anzongonzongo njengesambatho,

Ema amanzi phezu kweentaba.

₇Ekukhalimeni kwakho asaba,

Ezwini lendudumo yakho abaleka buphuthuphuthu;

₈Kwenyuka iintaba, kwehla izihlambo,

Aya kuloo ndawo ubuwasekele yona.

₉Wàmisa umda ukuba angegqithi,

Angabuye awugubungele umhlaba.

₁₀Ulothuma imithombo iye ezihlanjeni;

Ihamba phakathi kweentaba;

₁₁Iseza zonke iinyamakazi zasendle;

Amaesile asendle aqabula inxano lawo.

₁₂Kuhlala phezu kwayo iintaka zezulu,

Zitsholoza phakathi kwamasebe;

₁₃Uloseza iintaba kumagumbi akhe aphezulu;

Uyahlutha umhlaba ziziqhamo zezenzo zakho.

₁₄Ulontshulisela iinkomo utyani,

Nomfuno wokunceda umntu;

Ukuze kuphume isonka emhlabeni.

₁₅Iwayini iyivuyise intliziyo yomntu;

Bukhazimle ubuso ngeoli,

Isonka siyixhase intliziyo yomntu.

₁₆Iyahlutha imithi kaYehova,

Imisedare• yaseLebhanon awayityalayo,

₁₇Apho zakhela khona iintaka;

Ingwamza, isemisipresini• indlu yayo.

₁₈Iintaba zona ezo ziphakamileyo zezamagogo,

Amawa azímela iimbila.

₁₉Inyanga wayenzela amaxesha ayo,

Ilanga liyakwazi ukutshona kwalo.

₂₀Wènza ubumnyama wena, kube sebusuku,

Ashukume ngabo onke amarhamncwa ehlathi.

₂₁Iingonyama ezintsha zigqumela ukuqwenga,

Zifuna ukudla kwazo kuThixo.

₂₂Lakuthi chapha ilanga, ziyahlanganisana,

Zibuthume ezikhundleni zazo.

₂₃Úyaphuma umntu aye emsebenzini wakhe

Nasenkonzweni yakhe, ahlwise.

₂₄Hayi, ukuba zininzi izenzo zakho, Yehova!

Zonke ziphela uzenzé ngobululumko;

Ùzele umhlaba zizidalwa zakho.

₂₅Nâlo ulwandle lulukhulu, lubanzi ngeenxa zombini;

Kulapho kuzinambuzane zingenakubalwa,

Ezincinane kwanezikhulu izinto eziphilileyo.

₂₆Kulapho kuhamba iinqanawa;

Nango umnenga owawubumbela ukudlala kulo.

₂₇Zonke ezo nto ziphela zikhangele kuwe,

Ukuba uzìnike ukudla kwazo ngexesha elililo.

₂₈Ùyazinika, ziyachola;

Ùyasivula isandla sakho, ziyahlutha kokulungileyo.

₂₉Ùyabusithelisa ubuso bakho, ziyakhwankqiswa;

Ùyawuhlanganisa umoya wazo, ziphume umphefumlo,

Zibuyèle eluthulini lwazo.

₃₀Ùthuma umoya wakho, ziyadalwa,

Ubuhlaziye ubuso bomhlaba.

₃₁Ubuqaqawuli bukaYehova mabube ngunaphakade;

UYehova makavuye ngezenzo zakhe;

₃₂Ulobheka emhlabeni, uzamazame;

Uchukumisa iintaba, ziqhume.

₃₃Ndiya kuvuma kuYehova lo gama ndidla ubomi,

Ndiya kumbethela uhadi uThixo wam ekubeni ndingokhoyo.

₃₄Makube nencasa kuye ukucamngca kwam;

Mna ndiya kuvuya ngoYehova.

₃₅Mabagqitywe ehlabathini aboni,

Bangabi sabakho abangendawo.

Mbonge uYehova, mphefumlo wam,

Haleluya!