IINDUMISO 102

₁Yehova, wuve umthandazo wam,

Kufike kuwe ukuzibika kwam.

₂Musa ukubusithelisa ubuso bakho kum ngemini yokubandezelwa kwam,

Ndíthobele indlebe yakho;

Ngemini endidanduluka ngayo khawuleza undiphendule.

₃Ngokuba iyaphela imihla yam njengomsi;

Amathambo am avutha njengeziko.

₄Ibethwé yoma njengomfuno intliziyo yam,

Ngokuba ndilibele nokudla ukudla kwam.

₅Ngenxa yezwi lokugcuma kwam

Amathambo am atshele enyameni yam.

₆Ndifana nengcwangube yentlango,

Ndinjengesikhova sasemanxoweni.

₇Andilali;

Ndinjengentaka eyodwa phezu kwendlu.

₈Imini yonke ziyandingcikiva iintshaba zam,

Abandigezelayo bathuka ngam.

₉Ngokuba ndidlé uthuthu njengesonka,

Into endiyiselayo ndiyiphithikezé nezililo,

₁₀Ngenxa yokubhabhama kwakho noburhalarhume bakho;

Ngokuba ùndifunqule wandilahla.

₁₁Imihla yam injengokoluka kwamathunzi;

Mna ndomile njengomfuno.

₁₂Ke wena, Yehova, uhleli ngonaphakade,

Inkumbuzo yakho ikwizizukulwana ngezizukulwana.

₁₃Ùya kusuk' ume, uyiphathe iZiyon ngemfesane;

Ngokuba lixesha lokuyibabala eli, ngokuba lifikile ixesha elimisiweyo.

₁₄Ngokuba abakhonzi bakho bakholiswe ngamatye ayo,

Uthuli lwayo banofefe ngalo.

₁₅Ziya kuloyika iintlanga igama likaYehova,

Nookumkani bonke behlabathi ubuqaqawuli bakho;

₁₆Ngokuba eyakhile iZiyon uYehova,

Wabonakala ebuqaqawulini bakhe.

₁₇Uwubhekile umthandazo wabachushuluzayo,

Àkawudela umthandazo wabo.

₁₈Oko kuya kubhalelwa isizukulwana esizayo,

Abantu abaza kudalwa badumise uYehova.

₁₉Ngokuba úqondele, esendaweni yakhe ephezulu engcwele;

Wondela ehlabathini esemazulwini uYehova,

₂₀Ukuba akuve ukugcuma kwabakhonkxiweyo,

Abakhulule oonyana bokufa;

₂₁Bancokole eZiyon ngegama likaYehova,

Ngendumiso yakhe eYerusalem;

₂₂Ekubuthelaneni kwezizwe ndawonye,

Nezikumkani, ukuba zikhonze uYehova.

₂₃Úwathobile endleleni amandla am,

Uyinqamle imihla yam.

₂₄Ndithi, Thixo wam, musa ukundisusa phakathi kwemihla yam.

Ikwizizukulwana ngezizukulwana iminyaka yakho.

₂₅Waliseka kudala ihlabathi;

Lisisenzo sezandla zakho izulu.

₂₆Ezo zinto ziya kudaka, wena ke ume;

Zona zonke ziya konakala njengengubo,

Wòzigugisa njengesambatho, ziguge;

₂₇Ke wena uhleli unguwe,

Iminyaka yakho ayinakuphela.

₂₈Oonyana babakhonzi bakho baya kuhlala,

Imbewu yabo izimasèke phambi kwakho.