IMIZEKELISO 30

₁Amazwi ka-Agure unyana kaYakhe, waseMasa.

Itsho indoda leyo, ithi, Ndizidinisile, ndizidinisile ndaphela,

₂Kuba ndisisityhakala, andimntu;

Ingqondo yomntu ayikho kum.

₃Andifundanga bulumko,

Ukuba ndazi ukwaziwa koyiNgcwele.

₄Ngubani na owenyuka waya emazulwini, waza wehla?

Ngubani na ofumbethe umoya ngezandla zakhe?

Ngubani na obophe amanzi engutyeni?

Ngubani na omise zonke iziphelo zehlabathi?

Lingubani na igama lakhe, lingubani na igama lonyana wakhe, ukuba ùyalazi?

₅Yonke intetho kaThixo inyibilikisiwe.

Uyingweletshetshe kwabazimela ngaye.

₆Musa ukongeza emazwini akhe,

Hleze akohlwaye, ube ngothetha amanga.

₇Ndicelé kuwe izinto ezimbini;

Musa ukundivimba zona ndingekafi:

₈Khwelelisa kum inkohlakalo nelizwi lamanga;

Musa ukundinika ubuhlwempu nobutyebi;

Ndihlafunise isonka endisimiselweyo;

₉Hleze ndihluthe, ndikhanyele, ndithi, Ngubani na uYehova?

Hleze ndihlwempuzeke, ndibe,

Ndilicukuceze igama likaThixo wam.

₁₀Musa ukusihleba isicaka enkosini yaso,

Hleze sikutshabhise, uthwale ityala.

₁₁Kukho isizukulwana esitshabhisa uyise,

Singamsikeleli unina;

₁₂Kukho isizukulwana esihlambulukileyo kwawaso amehlo,

Esingahlanjwanga ekungcoleni kwaso;

₁₃Kukho isizukulwana, hayi, ukuqwayinga kwamehlo aso,

Ukuziphakamisa kweenkophe zaso!

₁₄Kukho isizukulwana esimazinyo angamakrele, simabamba azizitshetshe

Zokudla iintsizana ehlabathini, namahlwempu phakathi kwesintu.

₁₅Isimungunyi-gazi sineentombi ezimbini, ezithi, Ethe, ethe!

Zintathu izinto ezingenakuhlútha;

Ziné ezingàtshoyo ukuthi, Kwanele:

₁₆Lelabafileyo; kukungazali;

Ngumhlaba ongàhluthiyo ngamanzi;

Ngumlilo ongàtshoyo ukuthi, Kwanele.

₁₇Iliso eligculela uyise,

Lidele ukumlulamela unina,

Aya kulikrukra amahlungulu asemlanjeni,

Alidle amathole exhalanga.

₁₈Izinto zintathu ezibalulekileyo kum;

Hayi, ziné endingenakuzazi:

₁₉Yindlela yexhalanga esibhakabhakeni,

Yindlela yenyoka etyeni,

Yindlela yenqanawa esazulwini solwandle,

Yindlela yomfo nentombi.

₂₀Injalo indlela yomfazi okrexezayo:

Uyadla, asule umlomo,

Athi, Andenzanga bubi.

₂₁Ngaphantsi kwezinto ezintathu umhlaba uyanyikima,

Ngaphantsi kweziné ukhohliwe kukuthwala:

₂₂Ngaphantsi kwesicaka, xa sithe sangukumkani;

Nesidenge, xa sithe sahlútha sisonka;

₂₃Ngaphantsi kwesigele sentombi, xa sithe senda;

Nesicakakazi xa sithe sadla ilifa lenkosikazi yaso.

₂₄Izinto ziné ezincinane emhlabeni,

Kanti zilumke kakhulu:

₂₅Iimbovane ngabantu abangenamandla

Kanti zilungisa ukudla kwazo ehlotyeni;

₂₆Iimbila ngabantu abangòmeleleyo,

Kanti zimisa izindlu zazo emaweni;

₂₇Iinkumbi azinakumkani,

Kanti ziphuma zingamaqela ngamaqela zonke;

₂₈Icilitshe ùnako ukulibamba ngezandla,

Kanti lisemabhotweni ookumkani.

₂₉Izinto zintathu ezihamba ngokunyalasa,

Hayi, ziné ezilungisayo ukuhamba:

₃₀Yingonyama, igorha phakathi kwezinto ezizitho ziné,

Elingabuyi umva phambi kweento zonke;

₃₁Yinja elingesi; nokuba yinkunzi yebhokhwe;

Ngukumkani enomkhosi wakhe.

₃₂Ukuba ùthe wenza ngobudenge ngokuziphakamisa,

Nokuba uthe wankqangiyela,

Beka isandla emlonyeni.

₃₃Kuba ukucofa ubisi kuvelisa amasi,

Ukucofa impumlo kuvelisa igazi,

Ukucofa umsindo kuvelisa imbambano.