IMIZEKELISO 18

₁Ozahlulayo ufuna umnqweno wakhe;

Into yonke ezimasayo uyayivungamela.

₂Isinyabi asikunanzile ukuqonda;

Ke sinanzé ukuzityhila kwentliziyo yaso.

₃Ekuzeni kongendawo kuza ukudela,

Ukungcikiva, nokucukuceza.

₄Ngamanzi anzulu amazwi omlomo wendoda,

Ngumlanjana obalekayo, lithende lobulumko.

₅Ukukhetha ubuso bongendawo akulungile;

Nokugqwetha ilungisa ekuthetheni ityala.

₆Imilebe yomlomo wesinyabi ingena ekubambaneni,

Nomlomo waso ubiza amanqindi.

₇Umlomo wesinyabi uyasitshabalalisa,

Nemilebe yomlomo waso sisirhintyelo somphefumlo waso.

₈Amazwi entlebi yimithamo emnandi;

Yona ihla iye ezingontsini zombilini.

₉Nohilizayo eshishinini lakhe

Ngumninawa kaSokonakalisa.

₁₀Yinqaba ende eliqele igama likaYehova;

Ilungisa ligidimela kulo, libe sengxondeni.

₁₁Ubuncwane besityebi sisixeko saso esiliqele;

Bunjengodonga oluphakamileyo emabhongweni aso.

₁₂Phambi kwentshabalalo iyazidla intliziyo yendoda;

Phambi kozuko lululamo.

₁₃Ophendula ilizwi engekeva,

Kukumatha oko kuye, nehlazo.

₁₄Umoya wendoda uyasinyamezela isifo sayo;

Ke umoya odakumbileyo, ngubani na ongawuthwalayo?

₁₅Intliziyo yonengqondo irhweba ukwazi;

Nendlebe yezilumko ifuna ukwazi.

₁₆Isipho somntu siyamgabulela,

Simse phambi kwabakhulu.

₁₇Únga úlilungisa oqalelayo etyaleni lakhe;

Uza ummelwane wakhe, amgocagoce.

₁₈Liphelisa ingxabano iqashiso,

Libahlule abanamandla.

₁₉Umzalwana ekukreqiweyo kuye ulukhuni ngaphezu kwesixeko esiliqele,

Neengxabano zinjengomvalo woxande olude.

₂₀Ngesiqhamo somlomo wendoda uyahlútha umbilini wayo;

Iyahlútha ngongeniselo lomlomo wayo.

₂₁Ukufa nokuphila kusemandleni olwimi;

Abaluthandayo baya kudla isiqhamo salo.

₂₂Othe wafumana umfazi, ufumene okulungileyo;

Uzuzé okulikholo kuYehova.

₂₃Ihlwempu lithetha ngezibongozo;

Isityebi siphendula ngokulukhuni.

₂₄Indoda enezihlobo iyachithwa;

Kukho sithandwa sinamathelayo kunomzalwana.